Qo‘qon shahrida 14-sentabr kuni birinchi Xalqaro hunarmandchilik festivalining tantanali ochilish marosimi bo‘lib o‘tdi, deya xabar bermoqda Prezident matbuot xizmati. Marosimda Prezident Shavkat Mirziyoyev barchani chin yurakdan qutlab, O‘zbekistonga, ushbu anjumanga bo‘lgan katta hurmat va e’tibori uchun xorijiy mehmonlarga tashakkur izhor etdi.
“Umumbashariy madaniyatning ajralmas qismi bo‘lgan xalq amaliy san’ati dunyodagi har bir xalq hayotida, uning turmush tarzi va qadriyatlari rivojida alohida o‘rin tutadi. Insoniyatning ongli hayotida hunarmandchilikning paydo bo‘lishi — sivilizatsiya sari tashlangan eng muhim tarixiy qadam, desak, haqiqatni aytgan bo‘lamiz”, — dedi Shavkat Mirziyoyev.
O‘zbekiston Prezidenti buyuk avliyo va hunarmand Bahouddin Naqshband so‘zlaridan iqtiboslar keltirdi. O‘zbekistonda hunarmandlar mehnati qadrlanib, yoshlarning hunar o‘rganishi uchun keng imkoniyatlar yaratilayotgani, Qo‘qondagi festival bu sohani yanada rivojlantirishda muhim o‘rin tutishini qayd etdi.
“Ushbu xalqaro festival nafaqat ko‘pmillatli O‘zbekiston xalqi, balki jahon hunarmandlari, butun dunyo ustalarining katta bayrami, desak to‘g‘ri bo‘ladi. Bu — olis tarix va bugungi zamon nafasini, turli qadriyat va an’analarni o‘zida yaqqol namoyon etadigan, mushtarak dillarni birlashtiradigan chinakam do‘stlik va hamkorlik anjumanidir”, — dedi Prezident.
Prezident matbuot xizmatining qo‘shimcha qilishicha, Shavkat Mirziyoyev ochilish marosimidan so‘ng ushbu mahsulotlarni ko‘zdan kechirgan, hunarmandlar bilan suhbatlashgan.
Xalqaro hunarmandchilik festivali ikki yilda bir marta o‘tkaziladi. Bu yilgi anjumanda 78 ta mamlakatdan 370 dan ziyod hunarmandlar, san’atshunoslar, jurnalistlar ishtirok etmoqda. Festival O‘zbekiston Prezidentining 2018-yil 1-noyabrdagi qaroriga muvofiq o‘tkazilmoqda.
Izoh (0)