Qo‘qon shahridagi Buyuk allomalar muzeyida Prezident Shavkat Mirziyoyevning Farg‘ona viloyati faollari, nuroniylar, ziyolilar bilan muloqoti bo‘lib o‘tdi. Prezident matbuot xizmatining xabar berishicha, uchrashuvda madaniyat, ma’rifat sohalaridagi o‘zgarishlar, yoshlar ta’lim-tarbiyasi haqida so‘z borgan.
“Vaqt shiddat bilan o‘tyapti. Har bir soha bo‘yicha izlanishda, tinimsiz harakatdamiz. O‘zgarishlar bor, lekin hali bizni qanoatlantirmaydi”, — deb ta’kidlagan Prezident Shavkat Mirziyoyev Farg‘ona ziyolilari bilan uchrashuvda.
Davlat rahbarining matbuot xizmati qayd etishicha, “faollar butun Farg‘ona viloyatida bo‘lgani kabi Qo‘qon shahrida ham ulkan bunyodkorlik ishlari amalga oshirilayotgani, Xalqaro hunarmandchilik festivali tufayli shahar yanada obod bo‘lib, bu yerga butun dunyodan mehmonlar kelganini mamnuniyat bilan qayd etgan”.
Xabar berishlaricha, Buyuk allomalar muzeyi Prezident tashabbusi bilan tashkil etilgan. Bu yerga keluvchilar Qo‘qonda yashab, ijod qilgan adib va allomalar hayoti, asarlari haqida ma’lumot oladi. Buyumlar, turli idishlar esa o‘sha davr turmush tarzidan darak beradi.
Izoh (0)