Қўқон шаҳрида 14 сентябрь куни биринчи Халқаро ҳунармандчилик фестивалининг тантанали очилиш маросими бўлиб ўтди, дея хабар бермоқда Президент матбуот хизмати. Маросимда Президент Шавкат Мирзиёев барчани чин юракдан қутлаб, Ўзбекистонга, ушбу анжуманга бўлган катта ҳурмат ва эътибори учун хорижий меҳмонларга ташаккур изҳор этди.
«Умумбашарий маданиятнинг ажралмас қисми бўлган халқ амалий санъати дунёдаги ҳар бир халқ ҳаётида, унинг турмуш тарзи ва қадриятлари ривожида алоҳида ўрин тутади. Инсониятнинг онгли ҳаётида ҳунармандчиликнинг пайдо бўлиши — цивилизация сари ташланган энг муҳим тарихий қадам, десак, ҳақиқатни айтган бўламиз», — деди Шавкат Мирзиёев.
Ўзбекистон Президенти буюк авлиё ва ҳунарманд Баҳоуддин Нақшбанд сўзларидан иқтибослар келтирди. Ўзбекистонда ҳунармандлар меҳнати қадрланиб, ёшларнинг ҳунар ўрганиши учун кенг имкониятлар яратилаётгани, Қўқондаги фестиваль бу соҳани янада ривожлантиришда муҳим ўрин тутишини қайд этди.
«Ушбу халқаро фестиваль нафақат кўпмиллатли Ўзбекистон халқи, балки жаҳон ҳунармандлари, бутун дунё усталарининг катта байрами, десак тўғри бўлади. Бу — олис тарих ва бугунги замон нафасини, турли қадрият ва анъаналарни ўзида яққол намоён этадиган, муштарак дилларни бирлаштирадиган чинакам дўстлик ва ҳамкорлик анжуманидир», — деди Президент.
Президент матбуот хизматининг қўшимча қилишича, Шавкат Мирзиёев очилиш маросимидан сўнг ушбу маҳсулотларни кўздан кечирган, ҳунармандлар билан суҳбатлашган.
Халқаро ҳунармандчилик фестивали икки йилда бир марта ўтказилади. Бу йилги анжуманда 78 та мамлакатдан 370 дан зиёд ҳунармандлар, санъацҳунослар, журналистлар иштирок этмоқда. Фестиваль Ўзбекистон Президентининг 2018 йил 1 ноябрдаги қарорига мувофиқ ўтказилмоқда.
Изоҳ (0)