Qo‘qondagi xalqaro hunarmandchilik festivalida Surxondaryoda tikilgan dunyodagi eng katta so‘zana namoyish etilmoqda. Bu haqda “Daryo”ning Farg‘onadagi muxbiri xabar berdi.
Qo‘qon shahrida o‘tkazilayotgan birinchi xalqaro hunarmandchilik festivalida surxondaryolik kashtado‘z hunarmand Nilufar Jo‘rayeva tomonidan tayyorlangan dunyodagi eng katta milliy so‘zana namoyish etilmoqda. Ta’kidlanishicha, so‘zananing eni 21, bo‘yi 5,5 metrga teng.
Surxondaryo viloyati hokimligi matbuot xizmatiga ko‘ra, so‘zananing uzunligi 25, eni esa 6 metrni, og‘irligi 60 kilogrammni tashkil etgan.
Mazkur so‘zana Nilufar Jo‘rayeva hamda uning 20 nafar shogirdi tomonidan 6 oy davomida yaratilgan.
So‘zanani surxoncha serjilo naqshlar va yorqin ranglar bilan bezash uchun 16 kilogrammdan ortiq tabiiy usulda bo‘yalgan kalava ip sarflangan.
“So‘zanani tikishda vohaga xos bo‘lgan qadimgi kashtachilikning to‘ldirma yo‘nalishidan foydalandik. Uning markazida 5 ta gul (kashtachilikda oylar deb yuritiladi) tasvirlangan, ularninig har birining aylana diametri 2 metrni, atrofidagi kichik 14 ta gulning har birining diametri esa 1 metrni tashkil etadi”, — deydi hunarmand Nilufar Jo‘rayeva.
Izoh (0)