Қўқондаги халқаро ҳунармандчилик фестивалида Сурхондарёда тикилган дунёдаги энг катта сўзана намойиш этилмоқда. Бу ҳақда «Дарё»нинг Фарғонадаги мухбири хабар берди.
Қўқон шаҳрида ўтказилаётган биринчи халқаро ҳунармандчилик фестивалида сурхондарёлик каштадўз ҳунарманд Нилуфар Жўраева томонидан тайёрланган дунёдаги энг катта миллий сўзана намойиш этилмоқда. Таъкидланишича, сўзананинг эни 21, бўйи 5,5 метрга тенг.
Сурхондарё вилояти ҳокимлиги матбуот хизматига кўра, сўзананинг узунлиги 25, эни эса 6 метрни, оғирлиги 60 килограммни ташкил этган.
Мазкур сўзана Нилуфар Жўраева ҳамда унинг 20 нафар шогирди томонидан 6 ой давомида яратилган.
Сўзанани сурхонча сержило нақшлар ва ёрқин ранглар билан безаш учун 16 килограммдан ортиқ табиий усулда бўялган калава ип сарфланган.
«Сўзанани тикишда воҳага хос бўлган қадимги каштачиликнинг тўлдирма йўналишидан фойдаландик. Унинг марказида 5 та гул (каштачиликда ойлар деб юритилади) тасвирланган, уларниниг ҳар бирининг айлана диаметри 2 метрни, атрофидаги кичик 14 та гулнинг ҳар бирининг диаметри эса 1 метрни ташкил этади», — дейди ҳунарманд Нилуфар Жўраева.
Изоҳ (0)