Hozirgi kunda Moliya vazirligi tomonidan ishlab chiqilgan va O‘zbekiston Respublikasi normativ-huquqiy hujjatlar loyihalari muhokamasi portaliga joylashtirilgan yangi tahrirdagi Soliq kodeksi loyihasi jamoatchilik o‘rtasida keng muhokamaga sabab bo‘lmoqda, deb xabar beradi Adliya vazirligi Jamoatchilik bilan aloqalar bo‘limi.
Jumladan, kodeks loyihasining 488-moddasida advokatlik firmalari va byurolari soliq solish maqsadida tadbirkorlik subyektlari deb e’tirof etilishi nazarda tutilmoqda.
Ta’kidlash lozimki, “Advokatura to‘g‘risida”gi qonunda advokatlik firmalari va advokatlik byurolari notijorat tashkilotlar sifatida e’tirof etilgan bo‘lib, ular daromad (foyda) olishni o‘z faoliyatining asosiy maqsadi qilib olmaydi hamda olingan daromadlarni (foydani) o‘z qatnashchilari (a’zolari) o‘rtasida taqsimlamaydi.
“Taklif etilayotgan tartib advokatlik tuzilmalari soliq yukining oshishiga, bu o‘z navbatida, advokatura institutining rivojlanishiga to‘sqinlik qilishi, fuqarolarga va tadbirkorlik subyektlariga professional yuridik yordam ko‘rsatish sifatiga salbiy ta’sir ko‘rsatishi hamda tergov va sud ishi yuritishda malakali yuridik yordam olish huquqining konstitutsiyaviy kafolatlarini ta’minlashda qiyinchiliklar tug‘dirishi, yuridik yordam ko‘rsatish qiymatining oshishiga va aholiga ortiqcha sarf-xarajatlar olib kelishi mumkin. Yuqoridagi holatlar yurtimizda sud-huquq sohasida, xususan, advokaturaning rolini oshirish va aholiga maqbul yuridik xizmat ko‘rsatish borasida amalga oshirilayotgan islohotlarga to‘liq mos kelmaydi.
Yuqoridagilarni inobatga olib, Adliya vazirligi advokatlik firmalari va byurolarini tadbirkorlik subyektlariga tenglashtirish hamda ularni tadbirkorlik subyektlari sifatida soliqqa tortish masalasini maqsadga muvofiq emas deb hisoblaydi va mazkur kodeks loyihasini huquqiy ekspertizadan o‘tkazish jarayonida ushbu masala bo‘yicha o‘z munosabatini vakolatli organlarga bildiradi”, — deyiladi xabarda.
Avvalroq Advokatnews saytida bir necha advokatlarning bu 488-moddaga qarshi maqolalari e’lon qilingan, shuningdek, Soliq kodeksiga kiritilayotgan o‘zgartish Advokatlar palatasi tomonidan ham qoralangan edi.
Izoh (0)