10-sentabr, seshanba kuni O‘zbekiston tashqi ishlar vaziri Abdulaziz Komilov Xalqaro qizil xoch qo‘mitasining (XQXQ) Yevropa va Markaziy Osiyoda operatsion faoliyat mintaqaviy boshqarmasi direktori Martin Shyupp boshchiligidagi delegatsiyani qabul qildi. Bu haqda TIV matbuot xizmati xabar berdi.
Uchrashuvda keng qamrovli yo‘nalishlardagi, xususan, xalqaro gumanitar huquq normalarini joriy qilish, huquqni muhofaza qilish organlari va mudofaa xodimlari malakasini oshirish, favqulodda holatlarga, jumladan, sog‘liqni saqlash sohasidagi vaziyatlarga javob qaytarish mexanizmlarini takomillashtirish masalalari bo‘yicha hamkorlikning hozirgi holati va rivojlanish istiqbollari muhokama qilindi.
O‘zbekistonda XQXQ bilan munosabatlarning rivojlanish dinamikasi ijobiy baholanayotgani ta’kidlandi. O‘tgan yili mamlakat hukumati va XQXQ o‘rtasida “O‘zbekiston hududida XQXQ va uning mintaqaviy vakolatxonasi maqomi to‘g‘risida”gi shartnoma imzolanganligining 25 yilligi tantanali nishonlandi.
Suhbatda ikki tomon kun tartibidagi boshqa masalalar ham ko‘rib chiqildi.
Muzokaralarda XQXQning Toshkent shahridagi Mintaqaviy vakolatxonasi rahbari Jan-Jerom Kasabyanka ishtirok etdi.
Izoh (0)