Axborot va ommaviy kommunikatsiyalar agentligida O‘zbekiston Iqtisodiyot va sanoat vazirligi hamda “O‘zbekipaksanoati” rahbarlari ishtirokida “Respublikada ipakchilik tarmog‘ini yanada rivojlantirish chora-tadbirlari to‘g‘risida”gi Prezident qarori ijrosi yuzasidan matbuot anjumani bo‘lib o‘tdi.
Qarorga muvofiq, 2018—2021-yillarda pilla tayyorlash va uni qayta ishlash negizida yuqori qo‘shilgan qiymatli, eksportga mo‘ljallangan tayyor mahsulotlar ishlab chiqarish bo‘yicha investitsiya loyihalari ishlab chiqilgan.
Pilla mahsulotlarini eksport qilish bo‘yicha ko‘rsatkichlar yildan yilga o‘sib bormoqda. Xususan, 2018-yilda 71,1 million AQSh dollari qiymatida pillachilik mahsuloti eksport qilingan bo‘lsa, joriy yilda bu ko‘rsatkichni yil so‘nggiga qadar 70 million AQSh dollariga oshirish rejalashtirilgan. Shuningdek, mamlakatimizda ipak qurtini boqish va yetishtirishda sifat darajasi pasayib ketganligi sabab, biz chet davlatlardan o‘tgan yili 84 ming quti ipak qurtini import qilgan bo‘lsak, bu yil 150 ming quti keltirildi. Qarorda belgilangan vazifalardan kelib chiqib, 2022-yilda sifatli ipak qurtini yetishtirishni to‘liq mahallaylishtirib, O‘zbekistondan chet davlatlarga ipak qurtini eksport qilishni maqsad qilganmiz.Tadbir davomida, jurnalistlar tomonidan mutasaddilarga ipak qurtini boqishda sifat darajasini saqlab qolish maqsadida xonadonlardan qurtxonalar tizimiga qachon o‘tilishi borasida savol berildi.Shuhrat Abdulazizov, “O‘zbekipaksanoat” boshqarma boshlig‘i
Hozirda tut plantatsiyalari yonida qurtxonalar tashkillashtirilish jadal yo‘lga qo‘yilgan. Bundan tashqari, Yaponiya bilan ipakchilik ilmiy tadqiqot instituti o‘rtasida bu borada hamkorlik loyihalari ustida ish olib borilmoqda. Biroq biz masalaga bir tomonlama yondoshmasligimiz zarur. Pillachilik bilan bir necha yillardan buyon shug‘ullanib kelayotgan, bu soha ularga daromad manbasi bo‘lgan oilalar bor. Shundan kelib chiqqan holda ham, yaqin yillar ichida qurtxona tizimiga o‘tish haqida aniq gap aytolmaymiz.“O‘zbekipaksanoat” mutasaddilarining ta’kidlashicha, mamlakatda tut navlari va ipak qurtini yetishtirish sifati tobora yaxshilanib bormoqda.Sayfiddin Valiyev, Pillachilik ilmiy tadqiqot instituti direktori
“Joriy yilda ipakchilik sifati va yetishtirish miqdori bo‘yicha O‘zbekiston dunyo reytingida 3-o‘rinni egallagan”, — deydi “O‘zbekipaksanoat” uyushmasi axborot xizmati rahbari Dilshod Istamov.
Izoh (0)