O‘zbekistonda maktab va maktabgacha ta’lim muassasalari faoliyatini baholash bo‘yicha yangi mezonlar ishlab chiqildi. Bu haqda Toshkentda “Ta’lim sifatini ta’minlash va baholash: Xalqaro yondashuvlar va O‘zbekiston tajribasi” mavzusida bo‘lib o‘tgan seminar Ta’lim sifatini nazorat qilish davlat inspeksiyasi bosh boshqarma boshlig‘i Asliddin Odilov ma’lum qildi.
Uning so‘zlariga ko‘ra, O‘zbekistonda shu vaqtgacha ta’lim sifatini baholash bo‘yicha yagona tizim bo‘lmagan.
“Bugungi kunga qadar yurtimizda ta’lim sifatini baholash bo‘yicha yagona tizim bo‘lmagani sababli har kim o‘z mezonlari bo‘yicha muassasalar faoliyatini baholab kelavergan. Bu esa, o‘z navbatida, ta’lim muassasalari rahbarlari va pedagoglarining haqli e’tiroziga sabab bo‘layotgan edi. Endilikda ilg‘or xorijiy va mahalliy mutaxassislar bilan hamkorlikda maktab va maktabgacha ta’lim muassasalari faoliyatini baholash bo‘yicha yangi mezonlar ishlab chiqildi. Yangi mezonlar pedagoglar ishini yengillashtirish, ularning faoliyatida qog‘ozbozlik va buyruqbozlikni kamaytirish, ta’lim sifatini oshirishda ularga ko‘maklashish va qolaversa muassasa faoliyatini xolis baho berish maqsadida ishlab chiqildi”, — dedi Asliddin Odilov.Yangi tizimga ko‘ra, bundan buyon har bir ta’lim muassasasida o‘zini o‘zi baholash orqali ichki ta’lim sifati auditi shakllantiriladi. Bunda ta’lim oluvchilarning maktab hayoti va boshqaruviga oid fikrlari davriy ravishda o‘rganiladi va ular maktab boshqaruvida faol ishtirok etadi.
Ta’lim sifatini baholashda maktabning ota-onalar, kuzatuv kengashi, mahalla, bog‘cha va oliy ta’lim muassasalari bilan maktabni rivojlantirish bo‘yicha hamkorlik ishlariga asosiy urg‘u beriladi. Ichki baholash natijalariga shubha bo‘lgan taqdirdagina tashqi organ tomonidan tashqi baholash o‘tkaziladi.
Ta’kidlanishicha, yangi baholash tizimi ta’lim muassasalarida tekshirishlar sonini kamaytirishga xizmat qiladi. Ma’lum qilinishicha, bunda sifatni ta’lim muassasasining o‘zi baholab turishi va kamchiliklarni bartaraf etib borishi kutilmoqda.
Izoh (0)