Жамоатчилик ва олимлар бир йилдан ошиқ вақтдан бери Маданият вазирлиги тимсолида Мингўрик археологик обидаси муаммосига давлат эътиборини тортишга уринмоқда.
Тошкент марказидаги икки минг йиллик тарихга эга ёдгорликда ёриқлар пайдо бўлган. Археологик тадқиқотлар институти Тошкент бўлими мудири, тарих фанлари доктори Абдуҳаким Анорбоев ва Тошкент археологик экспедицияси раҳбари Маргарита Филанович обидага икки минорали улкан пахса девор таҳдид қилмоқда деган хулосага келди. Нафақат қадимий иншоот, балки ҳозирги даврда тикланган зинапояда ҳам ёриқлар пайдо бўлгани бу хулосани тасдиқлайди.
2009 йили, ёдгорлик археологлар томонидан тадқиқ қилинганидан сўнг вазирлик бу ерни консервация қилди. Ҳудуд усти ёпилиб, атрофга тўсиқ ўрнатилди. Кўрилган чоралар етарли бўлмагандек туюлдими, хом ғиштдан девор айлантирилди. Девор бироз муддат туриб, нурай бошлади. Шундан сўнг деворга пахсадан «кўйлак» кийгизилди ва икки минора тикланди. Бу янгиликнинг тахминий вазни 400 минг тоннани ташкил этади.
«Бу улкан оғирлик қўриқланадиган объектнинг ўзини пастга тортяпти. У барпо этилган вақт, яъни 10 йилдан бери ҳар йили деворларда дарзлар пайдо бўлаётганини кўриш мумкин. Бунинг чораси кўрилмаса, ёдгорлик тўлиқ вайрон бўлиши мумкин», — дея огоҳлантирганди Абдуҳаким Анорбоев 2018 йил 17 августдаги хулосасида.
Ҳаммадан ҳам ички йўлак деворида ҳосил бўлган дарз хавотирга солмоқда. Бошқа ёриқлар каби у ҳам кўп минг тонналик пахса девор томон йўналган. 2 минг йиллик Мингўрик дарзлар билан қопланиб, буткул йўқ бўлиб кетиш хавфи остида.
Изоҳ (0)