“Upl.uz” saytida 5-sentabr kuni Nukus davlat pedagogika institutida talabalarga majburiy tarzda qasamyod qabul qildirilgani to‘g‘risidagi xabar chop etilgan. Mazkur xabarda institutda talabalar qasamyod qilishga majburlangani, qasamyodgacha talabalar institutning ichki tartib-qoidalari bilan tanishtirilmagani to‘g‘risida so‘z borgan.
Institut matbuot xizmatiga ko‘ra, haqiqatan ham 5-sentabr kuni Nukus davlat pedagogika institutida yangi 2019—2020-o‘quv yilining ochilish marosimiga bag‘ishlangan tantanali tadbir bo‘lib o‘tgan. Bu bo‘yicha axborot institutning rasmiy veb-saytida ham “Talabalar qasamyod qabul qildi: Ularga talabalik guvohnomalari topshirildi” sarlavhasi bilan chop etilgan. Unda “Tadbirda institut talabalari o‘qish va ilmiy izlanish, o‘z ustida mukammal ishlab, institut ichki tartib-qoidalariga amal qilish, professor-o‘qituvchilar va boshqa talabalarni hurmat qilishga qasamyod qildi”, — deb yozilgan.
Biroq “Upl.uz” saytida e’lon qilinganidek talabalarni qasamyod qabul qilishga majburlash harakatlari bo‘lmagan. Ushbu nashrning o‘zbekcha talqini bo‘lgan “Everyday.uz”da ushbu xabar institut rasmiy veb-saytida e’lon qilinganidek, asl holida chop etilgan.
“Upl.uz” saytida chop etilgan rasm esa institut matbuot xizmati tomonidan olingan va rasmiy veb-saytda e’lon qilingan bo‘lib, unda talabalar tadbir boshlanishi arafasida O‘zbekiston va Qoraqalpog‘iston Respublikalari davlat madhiyalarini qo‘llarini ko‘ksiga qo‘ygan holda ijro etib turgani aks etgan.
Izoh (0)