Namangan shahrida “Paxtalikko‘l” kichik sanoat zonasi ish boshladi. Bu haqda “Daryo”ga shahar hokimligi matbuot xizmati ma’lum qildi.
Kichik sanoat zonasiga 2,8 gektar yer ajratilgan bo‘lib, bu yerda yengil sanoat, qurilish va oziq-ovqat sanoati yo‘nalishlarida umumiy qiymati 41,5 milliard so‘mlik 15 ta loyiha amalga oshirilishi rejalashtirilgan. Mazkur loyihalarga muvofiq, “Paxtalikko‘l”da import o‘rnini bosuvchi va eksportga yo‘naltirilgan erkaklar va bolalar poyabzallari, kostyum va kurtkalar, atlas va adras matolari, qandolatchilik mahsulotlari, yog‘ochni qayta ishlash, mebel, metall panjara va darvozalar ishlab chiqarish yo‘lga qo‘yiladi.
Tadbirkorlarga qulay sharoitlar yaratib berilishi natijasida joriy yilning birinchi yarmi yakuniga qadar kichik sanoat zonasida umumiy qiymati 26,2 milliard so‘mlik 10 ta loyiha — korxonalar, xususiy va yakka tartibdagi tadbirkorlik subyektlari ishga tushirilib, ularda 840 ta yangi ish o‘rni yaratildi. Hududdagi barcha loyihalar to‘liq ishga tushirilsa, ularning soni 1200 kishidan oshadi.
Ma’lumot uchun, Namangan shahrida jami 6 ta kichik sanoat zonasi tashkil etish belgilangan. 124 gektar maydonini egallagan “Orzu”, “Paxtalikko‘l”, “Yuksalish”, “Xonobod”, “Mashad” va “Zarbdor”da rejalashtirilgan barcha loyihalar to‘liq quvvat bilan ishga tushirilishi natijasida 16 mingdan ortiq yangi ish o‘rni yaratiladi, umumiy qiymati 1229,4 milliard so‘m bo‘lgan 211 ta loyiha amalga oshiriladi.
Izoh (0)