Toshkentdagi 110-maktab o‘quvchilarining xavfsizligini ta’minlash uchun Borovskiy ko‘chasi bir tomondan yopildi

Toshkent shahridagi 110-o‘rta maktab binosida ta’mirlash ishlari olib borilayotgani munosabati bilan, ushbu maktab o‘quvchilari uchun mashg‘ulotlar Borovskiy nomidagi tibbiyot kolleji binosiga ko‘chirilgan.

Shu munosabat bilan, Toshkent shahar IIBB matbuot xizmatidan xabar berishlaricha, kollej oldidagi Borovskiy ko‘chasida o‘quvchilar ishtirokidagi yo‘l-transport hodisalarining oldini olish maqsadida choralar ko‘rilgan.

Jumladan, Borovskiy ko‘chasida qatnov vaqtincha bir tomonlama qilib belgilandi: unga Shahrisabz ko‘chasidan burilib kirib, Sodiq Azimov ko‘chasiga chiqish mumkin, qarama-qarshi yo‘nalish bo‘ylab qatnov esa 3.1 “Kirish taqiqlangan” yo‘l belgisi bilan yopilgan. Shuningdek, Sodiq Azimov ko‘chasida Borovskiy ko‘chasiga burilish joyiga 4.1.1 “Harakatlanish to‘g‘riga” buyuruvchi belgisi o‘rnatilgan.

“Hurmatli ota-onalar! Sizdan ushbu o‘zgarishlarni yodda tutishni, yo‘l belgilariga e’tiborli bo‘lishni va yo‘l harakati qoidalariga rioya etishni so‘rab qolamiz”, — deyiladi Toshkent shahar IIBB axborotida.

Eslatib o‘tamiz, Toshkentdagi 110-maktab rossiyalik milliarder Alisher Usmonov homiyligida ta’mirlanmoqda.