Toshkent shahar hokimi Jahongir Ortiqxo‘jayev poytaxt aholisi bilan uchrashib, Chilonzor tumanidagi G‘afur G‘ulom nomidagi madaniyat va istirohat bog‘ida qanday o‘zgarishlar bo‘lishi haqida ma’lumot berdi. Bu haqda poytaxt hokimligi matbuot xizmati xabar bermoqda.
Ma’lum qilinishicha, qayta qurish jarayonida park eshiklari aholi uchun yopilmaydi, shuningdek, parkka kirish shu vaqtgacha bo‘lganidek bepulligicha qoladi. Shuningdek, rekonstruksiya ishlari tadbirkorlar faoliyatiga ham ta’sir qilmasligi, ular avvalgidek o‘z ishlarini davom ettirishlari mumkinligi aytilgan.
“Ushbu bog‘ soya-salqinligi va o‘simliklar dunyosiga boyligi bilan ajralib turadi. Qayta qurish jarayonida bu yashillik dunyosiga umuman zarar yetkazilmaydi, hech bir daraxt kesilmaydi”, — deyiladi hokimlik axborotida. Qayd etish joiz, 2018-yil avgustida Prezident Shavkat Mirziyoyev ushbu parkka kirganida uni qayta qurish haqida topshiriq bergan, biroq bu jarayonda birorta ham daraxt kesilmasligi kerakligini ta’kidlagan edi.
Hokimlik axborotida ta’kidlanishicha, bog‘dagi yaroqlilik muddatini o‘tab bo‘lgan attraksionlar yangi, zamonaviylariga almashtiriladi. Park ichidagi ta’mirtalab yo‘llar sozlanadi, veloyo‘laklar ham tashkil etilishi mumkin.
Izoh (0)