«Upl.uz» сайтида 5 сентябрь куни Нукус давлат педагогика институтида талабаларга мажбурий тарзда қасамёд қабул қилдирилгани тўғрисидаги хабар чоп этилган. Мазкур хабарда институтда талабалар қасамёд қилишга мажбурлангани, қасамёдгача талабалар институтнинг ички тартиб-қоидалари билан таништирилмагани тўғрисида сўз борган.
Институт матбуот хизматига кўра, ҳақиқатан ҳам 5 сентябрь куни Нукус давлат педагогика институтида янги 2019—2020-ўқув йилининг очилиш маросимига бағишланган тантанали тадбир бўлиб ўтган. Бу бўйича ахборот институтнинг расмий веб-сайтида ҳам «Талабалар қасамёд қабул қилди: Уларга талабалик гувоҳномалари топширилди» сарлавҳаси билан чоп этилган. Унда «Тадбирда институт талабалари ўқиш ва илмий изланиш, ўз устида мукаммал ишлаб, институт ички тартиб-қоидаларига амал қилиш, профессор-ўқитувчилар ва бошқа талабаларни ҳурмат қилишга қасамёд қилди», — деб ёзилган.
Бироқ «Upl.uz» сайтида эълон қилинганидек талабаларни қасамёд қабул қилишга мажбурлаш ҳаракатлари бўлмаган. Ушбу нашрнинг ўзбекча талқини бўлган «Everyday.uz»да ушбу хабар институт расмий веб-сайтида эълон қилинганидек, асл ҳолида чоп этилган.
«Upl.uz» сайтида чоп этилган расм эса институт матбуот хизмати томонидан олинган ва расмий веб-сайтда эълон қилинган бўлиб, унда талабалар тадбир бошланиши арафасида Ўзбекистон ва Қорақалпоғистон Республикалари давлат мадҳияларини қўлларини кўксига қўйган ҳолда ижро этиб тургани акс этган.
Изоҳ (0)