Podpolkovnik Dilmurod Mirsodiqov Toshkent shahar IIBB Tergov boshqarmasi boshlig‘i o‘rinbosari etib tayinlandi, deya xabar bermoqda Toshkent shahar IIBB matbuot xizmati.
Dilmurod Mirsodiqov 1979-yili Toshkent shahrida tug‘ilgan. 2000-yili O‘zbekiston IIV Akademiyasini tamomlagan. Ichki ishlar organlaridagi faoliyatini 2000-yili Shayxontohur tumani IIB Tergov bo‘limi tergovchisi sifatida boshlagan. 2010-yilga qadar Shayxontohur tumani IIB va Toshkent shahar IIBBning tergov bo‘linmalarida turli lavozimlarida ishlagan.
2010—2014-yillarda O‘zbekiston IIV Bosh tergov boshqarmasi (hozirgi Tergov departamenti)da bo‘lim boshlig‘i sifatida, 2014—2019-yillarda esa Toshkent shahar IIBB Tergov boshqarmasida turli lavozimlarda ishlagan. 2019-yil avgustidan beri Olmazor tumani Ichki ishlar organlari (IIO) faoliyatini muvofiqlashtirish boshqarmasi (FMB) boshlig‘i o‘rinbosari — tergov bo‘linmalarini tahlil qilish bo‘limi boshlig‘i sifatida mehnat qilib kelayotgan edi.
Podpolkovnik Ahmadjon Fozilov Toshkent shahar IIBBning Moliyaviy va moddiy-texnikaviy ta’minoti boshlig‘i o‘rinbosari — moddiy-texnik va xo‘jalik xizmati boshlig‘i etib tayinlandi.
Ahmadjon Fozilov 1970-yili Toshkent shahrida tug‘ilgan. 2008-yili Toshkent davlat pedagogika universitetini tamomlagan. Ichki ishlar organlaridagi faoliyatini 1996-yili Toshkent metropolitenini qo‘riqlash bo‘yicha IIBning saf bo‘linmalari batalyoni xodimi sifatida boshlagan.
2016-yilga qadar Toshkent metropolitenining Ichki ishlar boshqarmasi va Toshkent shahar IIBBning Patrul-post xizmati va jamoat tartibini saqlash boshqarmasida turli lavozimlarda ishlagan. 2016—2018-yillarda Olmazor tumani IIB boshlig‘i o‘rinbosari — jamoat tartibini saqlash xizmati boshlig‘i, 2018—2019-yillarda esa Olmazor tumani IIO FMB boshlig‘i o‘rinbosari sifatida mehnat qilgan. 2019-yilning yanvaridan avgustga qadar Olmazor tumani IIO FMB boshlig‘ining jamoat tartibini saqlash bo‘yicha o‘rinbosari sifatida ishlab kelayotgan edi.
Izoh (0)