O‘zbekistonning saylov to‘g‘risidagi qonun hujjatlariga tuzatish kiritildi

Saylov tizimining takomillashtirilishi munosabati bilan Konstitutsiya va bir qator qonunlarga tuzatishlar kiritildi, deya xabar bermoqda “Norma.uz”.

4-sentabrda imzolangan qonunda ko‘zda tutilgan tuzatishlarning ko‘pi Saylov kodeksi kuchga kirganligi bilan bog‘liq va qonun hujjatlarini unga muvofiqlashtirishga yo‘naltirilgan.

Xususan, unda quyidagilar aks ettirilgan:

• og‘ir va o‘ta og‘ir bo‘lmagan jinoyatlar sodir etganligi uchun sudning hukmi bilan ozodlikdan mahrum etish joylarida saqlanayotgan shaxslarning saylov va referendumda ishtirok etish huquqi. Shu tariqa, hozirda og‘ir va o‘ta og‘ir jinoyatlarni sodir etgan shaxslargina faol saylash huquqidan mahrum etilgan;
• saylov komissiyasining yangilangan vakolatlari;
• saylovchilarning yagona elektron ro‘yxati yuritilishi;
• saylov komissiyasi va referendum o‘tkazish komissiyasi a’zolariga qo‘yiladigan talablar;
• saylovoldi tashviqotini olib borish qoidalari;
• ovoz berishni tashkil qilish va o‘tkazish tartibi — vaqti va joyi, bino va xonalarni rasmiylashtirish talablari, saylov komissiyalari harakati, oldindan ovoz berish mexanizmlari va boshqalar.