“Buzilishi mo‘ljallangan binolarni baholash tartibini tasdiqlash to‘g‘risida” gi qarori loyihasi yuzasidan 200 ga yaqin takliflar bildirilgan. Bu haqda 6-sentabr, juma kuni Davlat aktivlarini boshqarish agentligi departmenti boshlig‘i Aziz Nagayev jurnalistlar bilan bo‘lgan muloqotda aytib o‘tdi, deya xabar bermoqda “Daryo” muxbiri.
Anjumanda Nagayev buzilishi rejalashtirilgan turar va noturar joylarni baholash tizimi shaffofligini ta’minlash maqsadida Vazirlar Mahkamasining “Buzilishi mo‘ljallangan binolarni baholash tartibini tasdiqlash to‘g‘risida”gi qarori loyihasi ishlab chiqilgani haqida ma’lumot berdi.
“Xalq fikri va qarashlarini inobatga olgan holda tayyorlangan qaror loyihasi “regulation.gov.uz” sayti orqali jamoatchilikka e’lon qilingan. Boshqa internet resurslaridagi izohlar bilan jamlanganda umumiy 200 ga yaqin takliflar bildirilgan. “Snos” ga tushgan turar va noturar joylarning huquqiy uyga egalik hujjatlari to‘liq rasmiylashtirilmagan, kadastr hujjatlarida o‘zboshimchalik holatlari ham ko‘plab kuzatiladi”, — dedi departament boshlig‘i.
Uning qo‘shimcha qilishicha, bir obyekt bo‘yicha bir qancha baholash hisoboti mavjud holatlar ko‘p kuzatilgan.
“Mulkdor va hokimiyat obyektni alohida baholashi natijasida nizolar kelib chiqqan. Bir baholash hisoboti bor, lekin uning to‘g‘ri ekanligiga shubha bo‘lsa, avvalo masalani oydinlashtirib, uni o‘rnatilgan tartibda haqqoniy emas, deb topish kerak. Baholash uyushmasida har bir viloyat bo‘yicha 30 ta ekspert ishlaydi. Ular ekspertiza qilmaydi, faqat konsultatsiya o‘tqazadi. Mulkdor baholash hisobotini komissiyaga taqdim qilganda ekspertlar tanishib maslahat berishi mumkin. Bir so‘z bilan aytganda, ekspertlar o‘z maslahati bilan masalani suddan oldin yechim topishda yordam beradi” — dedi u.
Izoh (0)