«Бузилиши мўлжалланган биноларни баҳолаш тартибини тасдиқлаш тўғрисида» ги қарори лойиҳаси юзасидан 200 га яқин таклифлар билдирилган. Бу ҳақда 6 сентябрь, жума куни Давлат активларини бошқариш агентлиги департменти бошлиғи Азиз Нагаев журналистлар билан бўлган мулоқотда айтиб ўтди, дея хабар бермоқда «Дарё» мухбири.
Анжуманда Нагаев бузилиши режалаштирилган турар ва нотурар жойларни баҳолаш тизими шаффофлигини таъминлаш мақсадида Вазирлар Маҳкамасининг «Бузилиши мўлжалланган биноларни баҳолаш тартибини тасдиқлаш тўғрисида»ги қарори лойиҳаси ишлаб чиқилгани ҳақида маълумот берди.
«Халқ фикри ва қарашларини инобатга олган ҳолда тайёрланган қарор лойиҳаси «regulation.gov.uz» сайти орқали жамоатчиликка эълон қилинган. Бошқа интернет ресурсларидаги изоҳлар билан жамланганда умумий 200 га яқин таклифлар билдирилган. «Снос» га тушган турар ва нотурар жойларнинг ҳуқуқий уйга эгалик ҳужжатлари тўлиқ расмийлаштирилмаган, кадастр ҳужжатларида ўзбошимчалик ҳолатлари ҳам кўплаб кузатилади», — деди департамент бошлиғи.
Унинг қўшимча қилишича, бир объект бўйича бир қанча баҳолаш ҳисоботи мавжуд ҳолатлар кўп кузатилган.
«Мулкдор ва ҳокимият объектни алоҳида баҳолаши натижасида низолар келиб чиққан. Бир баҳолаш ҳисоботи бор, лекин унинг тўғри эканлигига шубҳа бўлса, аввало масалани ойдинлаштириб, уни ўрнатилган тартибда ҳаққоний эмас, деб топиш керак. Баҳолаш уюшмасида ҳар бир вилоят бўйича 30 та эксперт ишлайди. Улар экспертиза қилмайди, фақат консултация ўтқазади. Мулкдор баҳолаш ҳисоботини комиссияга тақдим қилганда экспертлар танишиб маслаҳат бериши мумкин. Бир сўз билан айтганда, экспертлар ўз маслаҳати билан масалани суддан олдин ечим топишда ёрдам беради» — деди у.
Изоҳ (0)