Namangan shahar hokimligining rasmiy nashri hisoblangan “Namangan sadosi” gazetasi ta’sis etilganiga bu yil chorak asr to‘ldi. Bu haqda “Daryo”ga hokimlik matbuot xizmati ma’lum qildi.
Joriy yil boshqa nashrlar qatori mazkur gazeta uchun ham mashaqqatli yil bo‘ldi. Ikkinchi yarim yillik uchun obuna qoniqarsiz kechdi, tahririyat hisob raqamiga haminqadar pul tushdi. Pochta va “Matbuot tarqatuvchi”dagi avvalgi obuna pullarini undirish esa amrimahol bo‘lib qoldi. O‘z-o‘zidan, xodimlar ish haqini to‘lash ham muammoga aylandi.
— Xullas, gazetamiz jar yoqasida edi. Shahar hokimi Shavkatjon Abdurazzoqovning oldiga kirib, muammolarni tushuntirdik. U kishi bizni qo‘llab-quvvatlashini bildirib, hokimlik muassisligidagi gazeta uchun mahalliy budjetdan pul o‘tkazilishini aytdi. Oradan hech qancha vaqt o‘tmadi, va’da bajarildi. Avgust oyi oxirida shahar moliya bo‘limi orqali g‘aznadan tahririyat hisob raqamiga 80 million so‘m kelib tushdi. Darrov gazetaning bayram sonini tayyorlashga kirishdik va chop etdik, — deydi gazeta mas’ul xodimi Orifjon Jo‘rayev.
O‘tkazilgan summa yilning qolgan 4 oyi uchun bosmaxona, soliq, ish haqi va boshqa asosiy xarajatlarga sarflanadi. Yuqoridagi kabi muammolar takrorlanmasligi uchun tahririyat hozirdanoq kelgusi yil obunasi hozirligini boshlagan.
Ma’lumot uchun, mustaqillikning 28 yilligi munosabati bilan Prezident farmoniga muvofiq Namangan shahar hokimi Shavkatjon Abdurazzoqov “Sodiq xizmatlari uchun” medaliga munosib ko‘rildi.
Izoh (0)