Андижон вилоятининг Хонобод шаҳрида «Ўзбекистон темир йўллари» акциядорлик жамияти тасарруфидаги «Оловуддин» болалар соғломлаштириш оромгоҳи ўн йиллик танаффусдан сўнг қайта таъмирланиб, фойдаланишга топширилди. Бу ҳақда «Дарё» мухбири хабар бермоқда.
Хонобод шаҳри ҳокими Мусахон Мамадалиевнинг айтишича, мазкур оромгоҳ Андижон сув омбори ёнбағирларидаги сўлим ва баҳаво масканда жойлашган бўлиб, ьустақилликнинг илк йилларида хусусийлаштириш ҳисобига тадбиркорга берилган. Бироқ деярли 10 йилдан ортиқ фаолият олиб бормаган.
Президентнинг 2017 йилда Хонобод шаҳрига ташрифи давомида берган топшириғи ҳамда ҳукумат қарори билан тасдиқланган 2017—2019 йилларда Хонобод шаҳрини комплекс ривожлантириш чора-тадбирлари тўғрисидаги дастурига асосан оромгоҳ «Ўзбекистон темир йўллари» акциядорлик жамияти тасарруфига ўтказилган. 2017—2019 йиллар давомида «Қўқон минтақавий темир йўл узели» унитар корхонаси ҳамда «Андижон механика заводи» шуъба корхонаси томонидан оромгоҳда тўлиқ реконструкция ишлари бажарилган.
Мавсум давомида 800 нафар ўғил-қизни қабул қилиши кутилаётган оромгоҳда 200 ўринли ётоқхона, ошхона, маъмурий бино ҳамда тиббий кўрик хонаси қайта қурилган. Шунингдек, ота-оналар павильони, кир ювиш биноси, амфитеатр, иккита очик сув ҳавзаси, ювиниш павильони, кириш-чиқиш назорат пункти, турли ўйин майдонлари, дам олиш ўриндиқлари, декоратив фонтан, сув тозалаш биноси, маънавият ва маърифат хонаси ҳамда кутубхона қайта таъмирланиб, замонавий кўринишга келтирилган.
Бунинг учун жамият томонидан 19,5 миллиард сўм маблағ сарфланган.
Изоҳ (0)