Andijon viloyatidagi 34 ta kasb-hunar kollejining bino-inshootlari mebel va o‘quv-laboratoriya jihozlari, sport inventarlari bilan birgalikda xalq ta’limi tizimi tasarrufiga o‘tkazish bo‘yicha inventarizatsiya qilinib, tuman va shahar hokimlarining qarorlari bilan tasdiqlandi. Bu haqda “Daryo”ga viloyat xalq ta’limi boshqarmasi axborot xizmati xabar bermoqda.
Bosh vazirning 2019-yil 16-iyuldagi topshirig‘iga asosan 2019—2020-o‘quv yilida 15 kollej o‘rnida yangi umumiy o‘rta ta’lim maktablari tashkil etilgan. Qolgan 19 ta kasb-hunar kolleji binosiga esa mavjud maktablar ko‘chirilib, qo‘shimcha bino sifatida berilgan.
Viloyat xalq ta’limi boshqarmasi boshlig‘i Furqatbek Buzrukovning ma’lum qilishicha, yangi o‘quv yili oldidan investitsiya dasturiga binoan 26 ta umumta’lim maktabida 85,7 milliard so‘mlik qurilish-ta’mirlash ishlari amalga oshirilgan. Bundan tashqari, “Obod qishloq” va “Obod mahalla” dasturlari doirasida 29 ta umumta’lim maktabida qurilish-ta’mirlash ishlari olib borilmoqda. Ushbu maqsadlarga 101,4 milliard so‘mdan ortiq mablag‘ yo‘naltirilgan.
Shuningdek, viloyat hokimining tashabbusi bilan mahalliy budjet hisobidan Shahrixon va Ulug‘nor tumanlarida 2 ta yangi maktab qurilmoqda. Shu bilan birga, 20 ta maktabning qurilish-ta’mirlash ishlari uchun 69,8 milliard so‘m mablag‘ mahalliy budjetdan ajratilishi belgilanib, hozirda davom ettirilmoqda.
Ta’lim muassasalarining moddiy-texnik holatini yaxshilash maqsadida viloyatdagi xalqaro tadqiqotlarni amalga oshirishga yo‘naltirilgan 29 ta tayanch maktabining har biri mahalliy budjet hisobidan 87 ta videoproyektor bilan jihozlanib, ularga 201 million so‘mlik kimyo, fizika, biologiya fan kabinetlari jihozlari va laboratoriya anjomlari yetkazib berilgan.
Viloyatda ro‘yxatdan o‘tkazilgan 3 ta nodavlat umumta’lim maktabida 564 nafar o‘quvchi ta’lim olmoqda. 2019—2020-o‘quv yilida yana shuncha nodavlat maktabi ochilishi rejalashtirilgan.
Izoh (0)