Shimoliy kon boshqarmasi 3-gidrometallurgiya zavodida Sorbsiyalash jarayoni chiqindilarini yuqori samarali kuydirish majmuasi ishga tushirildi. Bu haqda Navoiy kon-metallurgiya kombinati matbuot xizmati xabar berdi.
Kon-metallurgiya sanoatining yetakchi korxonalari joylashgan Uchquduq tumani aholisi hayotida ro‘y berayotgan ulkan o‘zgarishdan nihoyatda mamnun.
Buni bepoyon Qizilqum bag‘ridagi konchilar yurti jamoli kundan kunga chiroy ochib, yangidan-yangi inshootlar hisobiga yanada ko‘rkamlashib borayotganidan ham bilsa bo‘ladi.
Kuni kecha eng ulug‘, eng aziz bayram arafasida uchquduqliklar ajoyib tarixiy voqea guvohi bo‘ldi. Shimoliy kon boshqarmasi 3-gidrometallurgiya zavodida Sorbsiyalash jarayoni chiqindilarini yuqori samarali kuydirish majmuasi ishga tushirildi.
Mazkur majmua ochilish marosimida kon-metallurgiya sohasi ilg‘orlari, mehnat faxriylari, chet ellik hamkorlar, loyihachi va quruvchilar, yosh mutaxassislar, Shimoliy kon boshqarmasi, 3-gidrometallurgiya zavodi va Uchquduq tumani hokimligi hamda jamoatchilik vakillari ishtirok etdi.
Tantanada so‘z olgan Navoiy kon-metallurgiya kombinati bosh direktori Quvondiq Sanaqulov, Germaniyaning Engineering Dobersek kompaniyasi bosh direktori Ing Albin Dobersek ushbu loyihaning mamlakat iqtisodiy hayotidagi ahamiyati to‘g‘risida o‘z fikr-mulohazalarini bildirdi.
Ma’ruzalarda Prezident qarori bilan tasdiqlangan Navoiy kon-metallurgiya kombinatini 2026-yilgacha rivojlantirish dasturiga ko‘ra barpo etilgan bu majmua “Ko‘kpatas” va “Dovgiztov” konlarining ishlashi qiyin bo‘lgan rudalardan oltin ajratib olish texnologiyasini takomillashtirishga qaratilgan eng istiqbolli investitsion loyihalardan biri bo‘lib, o‘zining ilg‘or muhandislik-texnik yechimlari, texnologik jihozlanish darajasi bilan noyob ekanligi, kelgusida xomashyodan foydalanish samaradorligini 8 foizgacha, tayyor mahsulot ishlab chiqarishni 11 foizga oshirishi va 150 dan ortiq yangi ish o‘rinlari yaratish imkonini berishi ta’kidlandi.
Bundan tashqari, ushbu yangi va zamonaviy ishlab chiqarish majmuasini barpo etishda Germaniyaning Engineering Dobersek va Eirich, Italiyaning Tenova, Avstriyaning Cemtec singari yetakchi xorijiy kompaniyalari, shuningdek, Zarafshon qurilish boshqarmasining “Promelektromontaj” tresti, “Shimoliy” qurilish-montaj boshqarmasi, “Elementqurilish” sho‘ba korxonasi, “Navoiy mashinasozlik zavodi” ishlab chiqarish birlashmasi hamda “Elektroizolit” mas’uliyati cheklangan jamiyati qo‘shma korxonasi kabi tashkilotlardan mutaxassislar, loyihachilar, quruvchilar faol ishtirok etgani e’tirof etildi.
O‘zbekiston Respublikasi davlat mustaqilligining 28 yillik bayrami arafasida bo‘lib o‘tgan tadbirda Navoiy kon-metallurgiya kombinati tomonidan ushbu xayrli ishda faol qatnashgan xorijiy hamkorlar, kombinat mutaxassislari, quruvchilar hamda ishchi-xizmatchilaridan 33 nafariga turli darajadagi “Konchilik shuhrati” ko‘krak nishoni, “NKMK faxriysi” unvoni, faxriy yorliq va qimmatbaho sovg‘alar topshirildi.
Izoh (0)