O‘zbekiston Qurolli Kuchlari tizimidagi oliy harbiy ta’lim muassasalarining birinchi kursiga saralab olingan kursantlar va o‘quvchi yoshlar uchun Chirchiq dala-o‘quv maydonida harbiy texnikalar va qurol-aslahalar namoyishi va ularning amaliy qo‘llanishiga oid ko‘rgazma tashkil etildi. Bu haqda Mudofaa vazirligi Axborot va ommaviy kommunikatsiyalar departamenti “Daryo”ga ma’lum qildi.
Tadbirda mudofaa vaziri o‘rinbosari general-mayor Azizbek Ikromov ishtirok etib, o‘z so‘zida harbiy xizmat mashaqqati, bu ulug‘ kasbning saodati, yurt sha’ni, Vatan qadri haqida to‘xtalib, kursantlarning kelgusi xizmatlariga muvaffaqiyat tiladi.
“Siz tanlagan yo‘l ulug‘ yo‘ldir. Kasbingiz faxringizdir. Vatanga xizmat naqadar sharafli ekanligini vaqt o‘tgan sari ich-ichingizdan anglab boraverasiz. Bu yo‘lda sizdan talab etiladigan birdan-bir narsa shuki, ko‘proq o‘qib, ko‘proq bilim egasi bo‘ling. Mahoratingizni oshiring, Vatanga sadoqat bilan xizmat qiling”, — dedi mudofaa vaziri o‘rinbosari.
Kursantlar avval harbiy texnikalar, raketa-artilleriya qurollari, o‘qotar va guruh qurollari, harbiy aviatsiya texnikalari va aviatsiya qurollari namunalari bilan tanishdi. Shundan so‘ng harbiy texnika va o‘qotar qurol-aslahalarning jangovar imkoniyatlarining amaliy namoyishi uyushtirildi.
Kursant va o‘quvchilar O‘zbekiston armiyasining salohiyati, kuch-qudrati va harbiy xizmatchilarning jangovar qobiliyati haqida yetarlicha tasavvurga ega bo‘ldi. Yuqori bosqich kursantlari tomonidan yakson etilgan har bir shartli nishon ular tomonidan qizg‘in olqishlandi.
Izoh (0)