AQSH rasmiylari Rossiya va Ukraina 8-avgustgacha o‘t ochishni to‘xtatish va tinchlik bitimini imzolashni istamoqda. Bu haqda AQSHning BMTdagi doimiy vakili o‘rinbosari Jon Kelli ma’lumot berdi.
Rossiya va Ukraina o‘t ochishni to‘xtatish va mustahkam tinchlik o‘rnatish bo‘yicha kelishib olishi kerak. Bitim tuzmoq vaqti keldi. Prezident Tramp bu 8-avgustgacha amalga oshirilishi kerakligini aniq aytdi. AQSH tinchlikni ta’minlash uchun qo‘shimcha choralar ko‘rishga tayyor, dedi Kelli.
Tramp 29-iyul kuni Moskvaga urushni yakunlash uchun o‘n kun muhlat bergan edi. Bu muddat 8-avgustda yakunlanadi. Avvalroq 14-iyul kuni u 50 kunlik muddat haqida gapirgan, biroq Rossiyaning hujumlarni kuchaytirayotgani va Ukrainaning tinch aholisini nishonga olayotgani bois, Tramp o‘z pozitsiyasini keskinlashtirgan.
Agar talablar bajarilmasa, AQSH prezidenti Rossiyaga hamda u bilan savdo aloqalarini davom ettirayotgan davlatlarga qarshi 100 foizlik boj tariflarini joriy etishini aytgan. Bu bo‘yicha ilk sanksiyalar paketini respublikachi senator Lindsi Grem tayyorlagan. Dastlab 500 foizlik bojlar ko‘zda tutilgan bo‘lsa-da, keyinchalik u 100 foizga tushirilgan.
Kreml bu tahdidlarga javoban, Rossiya AQSH bosimiga qaramay harbiy harakatlarni to‘xtatmasligini bildirdi. Putinning matbuot kotibi Dmitriy Peskovga ko‘ra, Rossiyaning Ukrainadagi amaliyotlari “milliy manfaatlarni himoya qilish” sifatida baholanadi. U, shuningdek, Rossiya iqtisodiyoti G‘arb sanksiyalariga nisbatan “immunitet”ga ega ekanini ta’kidladi.
Rossiya prezidenti amerikalik hamkasbining ultimatumi fonida ommaviy izoh bermagan. Biroq uning safdoshi — Rossiya Xavfsizlik kengashi raisi o‘rinbosari, sobiq prezident Dmitriy Medvedev ijtimoiy tarmoqlarda Tramp va senator Grem bilan ochiq bahsga kirishgan. U AQSHga nisbatan “yadroviy apokalipsis” bilan tahdid qilgan. Bunga javoban Tramp uni bunday hujumlardan ogohlantirib, “o‘ta xavfli hududga qadam qo‘yayotganini” ta’kidlagan.
Izoh (0)