Maguayr, Feliks, Ronaldu. Dunyoning eng qimmat futbolchilaridan tuzilgan ramziy terma jamoa haqida

So‘nggi yillarda futbol muxlislari katta transferlar guvohiga aylandi. Quyida maydondagi amplualari bo‘yicha transfer rekordlari haqida suhbatlashamiz.

Darvozabon — Kepa Arrisabalaga (“Chelsi”)

Tibo Kurtuaning “Real”ga o‘tib ketishi sabab, “Chelsi” yangi darvozabon uchun rekord miqdorda pul sarflashiga to‘g‘ri keldi. “Aristokratlar” “Atletik” posboni Kepa Arrisabalaning transferiga 80 million yevro sarfladi. “Chelsi” bu orqali nafaqat iste’dodli darvozabonga ega bo‘ldi, balki biroz vaqt muqaddam “Liverpul” tomonidan o‘rnatilgan rekordni ham yangiladi.

O‘ng qanot himoyachisi — Aaron Uan-Bissaka (“Manchester Yunayted”)

Ko‘pchilik tanimaydigan futbolchi uchun “Manchester Yunayted” 55 million yevro to‘lashdan qo‘rqmadi. Natijada Aaron Uan-Bissaka dunyoning eng qimmat o‘ng qanot himoyachisiga aylandi. 21 yoshli himoyachi Manchester klubi bilan 5+1 ko‘rinishidagi shartnomaga imzo chekdi. Futbolchining o‘yiniga qarab, uning shartnomasi bir yilga avtomatik ravishda uzaytirilishi mumkin.

Markaziy himoyachi — Harri Maguayr (“Manchester Yunayted”)

Dunyoning ayni damdagi eng qimmat himoyachisi — Harri Maguayr. “Manchester Yunayted” futbolchi uchun “Lester”ga 88 million yevro to‘lashiga to‘g‘ri keldi. “Qizil iblislar” Maguayrga yil davomida qiziqish bildirib keldi, ammo uning transferi hadeganda hal bo‘lavermadi. “Lester” ham futbolchining narxini ko‘tarishdan charchamadi va tomonlar oxir-oqibat 88 million yevrolik narxda kelishuvga erishdi. Hozircha futbolchi mavsumni yomon boshlamadi. “Chelsi”ga qarshi o‘yinda “Manchester Yunayted” o‘z darvozasi daxlsizligini saqlab qolgan holda yirik hisobda g‘alaba qozondi.

Markaziy himoyachi — Matteys de Ligt (“Yuventus”)

“Keksa sinyora” so‘nggi mavsum nafaqat A Seriyada g‘olib chiqdi, balki “tilla bola” uchun transferlar bozoridagi jangda ham muvaffaqiyatga erishdi. 2019-yil Yevropa maydonlarida shovqin-suron “Ayaks”ning 19 yoshli sardori uchun “Yuventus” 85,5 million yevrodan kechishiga to‘g‘ri keldi. Turin klubi muxlislari esa de Ligt tez orada Jorjio Kyellinining o‘rnini egallashiga qattiq ishonmoqda.

Chap qanot himoyachisi — Benjamen Mendi (“Manchester Siti”)

2017-yilda “Manchester Siti” “Monako”dan yana bir yirik transferni amalga oshirdi. “Shaharliklar” Benjamen Mendi uchun knyazliklarga 57,50 million yevro to‘ladi. Natijada Mendi o‘sha vaqtdagi jahonning eng qimmat chap qanot himoyachisiga aylandi. Va bu nom hozirgacha ham saqlanib turibdi. Ammo futbolchi jarohatlar sabab ko‘p ham maydonga tushayotgani yo‘q. Biroq u jarohat bilan bo‘lsa-da, “Siti” bilan sovrinlarni qo‘lga kiritishda davom etmoqda. So‘nggi vaqtlarda esa Xosep Gvardiola Mendidan ko‘ra, ukrainalik Oleksandr Zinchenkoga ishonch bildirmoqda.

Yarim himoyachi — Pol Pogba (“Manchester Yunayted”)

Yana bir transfer rekordlaridan biri “Manchester Yunayted”ga tegishli. Pol Pogbani “Yuventus”dan qaytarib olishni xohlagan “qizil iblislar”ning 105 million yevro to‘lashiga to‘g‘ri kelgan. Pogba esa bu pullarga haqiqatda ham arzishini bir necha yildan beri mankunianlar safida isbotlashga harakat qilib kelmoqda. So‘nggi vaqtda esa uning Manchesterda baxtsiz ekanligi va “Real”ga o‘tishi mumkinligi haqida xabarlar avjiga chiqdi.

Yarim himoyachi — Joa Feliks (“Atletiko Madrid”)

“Atletiko” 2019-yil yozgi transferlar vaqtida ko‘pchilik ajablantirgan holda yirik transferlarni amalga oshirdi. Xususan, 127 million yevro evaziga portugaliyalik yangi yulduz, 19 yoshli Joau Feliksni “Benfika”dan sotib oldi. Madrid klubi Feliksga “Barselona”ga o‘tib ketgan Antuan Grizmanning o‘rinbosari sifatida qaramoqda. Mavsumoldi yig‘inlarida Feliks juda sermahsul o‘yin ko‘rsatdi va o‘zi uchun sarflangan millionlar bejiz ketmaganini isbotlashga tushdi hisob.

Yarim himoyachi — Filippe Koutinyo (“Barselona”)

“Barselona” Neymarni sotib yuborgach, uning o‘rniga boshqa bir braziliyalik futbolchini olib kelishga qaror qildi. Ammo katalonlar uchun bu arzonga tushmadi. Klub Filippe Koutinyo uchun “Liverpul”ga 145 million yevro to‘lashiga to‘g‘ri keldi. Biroq braziliyalik futbolchi “Barselona”da uzoq saqlanib qolmadi. 2019-yil 19-avgust kuni Koutinyo ijara asosida “Bavariya” o‘yinchisiga aylangani e’lon qilindi. Myunxen klubi kelasi mavsum so‘ngida futbolchini sotib olish huquqini ham qo‘lga kiritdi.

Hujumchi — Kilian Mbappe (PSJ)

1958-yilgi Jahon Chempionatida Pele yosh bo‘lishiga qaramay final uchrashuvida gol urishga erishgandi. 2018-yilga kelib uning rekordini fransiyalik Kilian Mbappe yangilashga erishdi. JCh—2018 dagi o‘yinlari orqali fransuz Ronaldu va Messiga o‘rinbosar paydo bo‘lganini isbotlab bergandek bo‘ldi. PSJ esa o‘ylab o‘tirmasdan futbolchi uchun 135 million yevroni “Monako”ning hisob raqamiga o‘tkazib berdi. Hozirda esa futbolchi PSJning ishongan tog‘iga aylangan.

Hujumchi — Krishtianu Ronaldu  (“Yuventus”)

“Yuventus” bir muddat “Real”ning ketma-ket Yevropa Chempionlar Ligasidagi g‘alabalari sirlarini o‘rganishga harakat qildi. V bu sir — Krishtianu Ronalduda ekanligini tushunib yetdi. 10 yildan beri barqaror o‘yin ko‘rsatib kelayotgan portugaliyaliksiz yevroarenada g‘alaba qozonish imkonsiz ishdek ekanligini his qilgan turinliklar Ronalduni 120 million yevro evaziga “Real”dan sotib oldi. Ronaldu ushbu ro‘yxatdagi eng yoshi katta futbolchi. Ammo u bu pullarga ishlaydi. U A Seriyadagi ilk mavsumida 21 ta gol urib, chempionga aylandi. Biroq Chempionlar Ligasida g‘alaba qozonishning uddasidan chiqa olmadi.

Hujumchi — Neymar (PSJ)

So‘nggi vaqtlarda PSJdan ketishi kutilayotgan Neymar uchun parijliklar 222 million yevro to‘lagandi. “Barselona” esa uni “Santos”dan olib kelish uchun 2013-yilda 88 million yevroning bahridan o‘tgandi. Ko‘plab muxlislar hamon Neymarning “Barselona” afsonasi bo‘lishdan voz kechib, PSJga o‘tib ketganini tushunmaydi. Uning statistikasi ham yomon emasdi — 186 ta o‘yin, 105 ta gol. Ammo qatarlik shayxlarning puliga rad javobini berish juda ham mushkul.