“Barselona” yutqazgan, “Real” chiroyli gollar urgan, “Atletiko”ning 126 mln yevrolik yulduzi jarohat olgan La Liganing 1-tur tafsilotlari

Muxlislar katta futbolni sog‘inib qolgan Ispaniya La Ligasida ham yangi mavsumga start berildi. 16-19-avgust kunlari 2019/20-yilgi mavsumning 1-tur o‘yinlari bo‘lib o‘tdi. Mavsum boshi bo‘lishiga qaramay, jamoalar bir muncha sermahsul o‘yin namoyish etdi. Tur o‘z navbatida kutilmagan va kutilgan natijalari bilan yodda qoldi. “Daryo” esa an’anaga muvofiq tur tafsilotlari bilan bo‘lishadi.

“Atletik Bilbao”—“Barselona”

Mavsumni va turni amaldagi chempion “Barselona” safarda Bilbaoning “Atletik”ka qarshi o‘yin bilan boshlab berdi. Ernesto Valverde mazkur o‘yinda jarohat sabab Leo Messining xizmatlaridan foydalana olmadi. Va bu safar ham“Barselona” Messisiz umuman boshqa jamoaga aylanib qolishini isbotladi. Aksiga olib, “Barselona” birinchi bo‘lim so‘ngiga kelib, jarohat sabab Luis Suaresdan ham ayrildi. Shundan so‘ng na Usmon Dembele va na 120 million yevro evaziga yozgi transferlar vaqtida olib kelingan Antuan Grizmanning o‘yini o‘xshadi. Uchrashuv taqdirini esa zaxiradan o‘yinga qo‘shilgan Arits Aduris hal qildi. 38 yoshli ispaniyalik hujumchi 88-daqiqada yaqinda “Atletik” bilan 9 yillik shartnoma imzolagan Inyaki Uilyams o‘rniga maydonga tushdi va oradan bir daqiqda o‘tib, o‘sha “qariya” Mark Andre ter-Shtegen darvozasiga “qaychi” usulida gol urdi. Shu tariqa basklar o‘z maydonida o‘tgan o‘yinda amaldagi chempionni tiz cho‘ktirishga erishdi.

“Selta”—“Real”

Azaliy raqibi mag‘lubiyatga uchraganidan boxabar bo‘lib maydonga tushgan Zinedin Zidan shogirdlari Vigoda “Selta”dan ustun keldi. Mavsum avvalida Rodrigo, Militao, Yovich, Azar kabi futbolchilarni safiga qo‘shib olgan “Real” “Selta” bilan o‘yinga ko‘plab yo‘qotishlar bilan borgandi. Jumladan, Markos Asensio, Ferlan Mendi va Eden Azar jarohati sabab madridliklarga yordam bera olmadi. Ammo ularning yo‘qligini Garet Beyl, Toni Kroos va Karim Benzema kabi o‘yinchilar bildirmadi. O‘yinda hisobni jamoadan ketishi ovoza qilingan Garet Beylning qoyilmaqom uzatmasidan so‘ng Karim Benzema ochdi. Birinchi bo‘lim 0:1 hisobida “Real”ning ustunligi bilan yakunlandi. Ikkinchi bo‘limning 56-daqiqasida Luka Modrich Denis Suaresga nisbatan qo‘pol o‘ynadi. Hakam esa VAR yordamida Modrichga qizil kartochka ko‘rsatdi. Qayd etish joiz, Luka Modrich “Real”dagi 7 yillik faoliyatida birinchi, 16 yillik futbolchilik faoliyatidagi ikkinchi qizil kartochkasini oldi. Bir kishi kam bo‘lib qolganiga qaramay “Real” yana ikki bor Ruben Blanko darvozasini ishg‘ol qildi. Avvaliga Kroos o‘zining o‘ta kuchli zarbasi bilan chiroyli gol sohibi bo‘lgan bo‘lsa, zaxiradan o‘yinga qo‘shilgan Lukas Vaskes esa Marselo—Isko—Benzema kombinatsiyasiga chiroyli yakun yasadi. “Selta” esa sondagi ustunlikdan foydalanib, uchrashuv asosiy vaqtining so‘nggi daqiqasida gol urib, hisobni biroz qisqartirishga erishdi.

Shu tariqa “Real” mavsumni ishonchli g‘alaba bilan boshladi.

“Valensiya”—“Real Sosyedad”

O‘tgan mavsum yakuniga ko‘ra, kuchli to‘rtlikka kirib Chempionlar Ligasiga qaytishni uddalagan “Valensiya” mavsumni omadsiz boshladi. “Ko‘rshapalaklar” ilk turda “Real Sosyedad”ni “Mestalya”da mehmon qildi. Avvaliga 58-daqiqada Kevin Gameyro mehmonlar darvozaboni Migel Anxel Moyyani ranjitdi. Hammasi “Valensiya” g‘alabasi tomon ketayotgan edi. 95-daqiqada Gameyro Denis Cherishevga nisbatan ishlatilgan qo‘pollik uchun belgilangan penaltini ko‘kka sovurdi. O‘yinga qo‘shib berilgan so‘nggi daqiqada esa “Real Sosyedad” penalti tepish imkoniyatini qo‘lga kiritdi. Fransis Koklen jarima maydonchasi ichida to‘pni qo‘li bilan o‘ynagani uchun ikkinchi sariq kartochkani olib, maydonni tark etdi. Penaltini esa yoshlar o‘rtasida Yevropa chempionatida Ispaniya termasi bilan g‘oliblikni qo‘lga kiritgan Mikel Oyarsabal aniq amalga oshirdi.

“Vilyarreal”—“Granada”

Turning eng sermahsul o‘yini esa “Estadio de la Seramika” stadionida kechdi. Unda mezbon “Vilyarreal” “Granada” bilan haqiqiy jangga kirishdi. Birinchi bo‘limda muxlislar ikkita penaltidan kiritilgan gollarning guvohi bo‘ldi. Mezbonlar safida Santi Kasorla o‘z nomini tabloga yozdirib qo‘ygan bo‘lsa, mehmonlardan Viko hisobni tenglashtiruvchi golga mualliflik qildi. Ikkinchi bo‘limda esa hisobda quvlashmachoq boshlandi. Moyses Gomes 53-daqiqada mezbonlarni hisobda oldinga olib chiqdi. 62-daqiqada esa Machis muvozanatni tikladi. Oradan 3 daqiqa o‘tib, Jerar Moreno mezbonlarning uchinchi golini urdi. 73-daqiqada Chukvueze “sariq suvosti kemasi”ning hisobdagi ustunligini yana bitta golga oshirdi. Oradan hech qancha o‘tmay Roberto Soldado hisobni qisqartirgan bo‘lsa, 81-daqiqada “Granada” a’zosi Puertas o‘yindagi so‘nggi golga mualliflik qildi.

Shu tarzda tomonlar 4:4 hisobidagi jangovar durangga imzo chekdi.

“Espanyol”—“Sevilya”

“Real” sobiq ustozi Xulen Lopetegi qo‘l ostiga o‘tgan “Sevilya” Kataloniya shahriga safar qilib, “Espanyol”dan ustun keldi. Uchrashuvda hisobni 44-daqiqada “Real”dan ijaraga olingan Serxio Regilon ochdi. Ikkinchi gol esa 86-daqiqada Nolito tomonidan kiritildi. Qayd etish joiz, Regilon ikkinchi golda assistent vazifasini bajarib berdi.

“Atletiko Madrid”—“Xetafe”

Turning so‘nggi o‘yini esa Madridda bo‘lib o‘tdi. Yozgi transferlar vaqtida mablag‘ni ayamagan “Atletiko” o‘tgan mavsum kuchli beshlikka kirgan “Xetafe”ni qabul qildi. Uchrashuvdagi yagona gol 23-daqiqada “Real” tarbiyalanuvchisi Alvaro Morata tomonidan kiritildi. Morata “Tottenhem”dan olib kelingan Kiran Trippyerning uzatmasini Soriya darvozasiga joylab qo‘ydi. Asabiy tarzda kechgan o‘yinning 38-daqiqasida “Xetafe” a’zosi Molina to‘g‘ridan to‘g‘ri qizil kartochka bilan jazolangan bo‘lsa, oradan 4-daqiqa o‘tib, mezbonlar himoyachisi Lodi ikkinchi sariq kartochkasini olib maydonni erta tark etdi. Ikkinchi bo‘lim esa Joau Feliksning kichik jarohat olib maydonni tark etishi bilan esda qoldi. 126 million yevroga xarid qilingan portugaliyalik yosh yulduz avvaliga qoyilmaqom yurishidan so‘ng penalti ishladi. Uni Morata ko‘kka sovurdi. Oradan 6 daqiqa o‘tib esa futbolchi oyoq mushaklaridagi og‘riq sabab o‘z o‘rnini “Real”dan olib kelingan Markos Lyorentega bo‘shatib berdi.