Магуайр, Феликс, Роналду. Дунёнинг энг қиммат футболчиларидан тузилган рамзий терма жамоа ҳақида

Сўнгги йилларда футбол мухлислари катта трансферлар гувоҳига айланди. Қуйида майдондаги амплуалари бўйича трансфер рекордлари ҳақида суҳбатлашамиз.

Дарвозабон — Кепа Аррисабалага («Челси»)

Тибо Куртуанинг «Реал»га ўтиб кетиши сабаб, «Челси» янги дарвозабон учун рекорд миқдорда пул сарфлашига тўғри келди. «Аристократлар» «Атлетик» посбони Кепа Аррисабаланинг трансферига 80 миллион евро сарфлади. «Челси» бу орқали нафақат истеъдодли дарвозабонга эга бўлди, балки бироз вақт муқаддам «Ливерпуль» томонидан ўрнатилган рекордни ҳам янгилади.

Ўнг қанот ҳимоячиси — Аарон Уан-Биссака («Манчестер Юнайтед»)

Кўпчилик танимайдиган футболчи учун «Манчестер Юнайтед» 55 миллион евро тўлашдан қўрқмади. Натижада Аарон Уан-Биссака дунёнинг энг қиммат ўнг қанот ҳимоячисига айланди. 21 ёшли ҳимоячи Манчестер клуби билан 5+1 кўринишидаги шартномага имзо чекди. Футболчининг ўйинига қараб, унинг шартномаси бир йилга автоматик равишда узайтирилиши мумкин.

Марказий ҳимоячи — Ҳарри Магуайр («Манчестер Юнайтед»)

Дунёнинг айни дамдаги энг қиммат ҳимоячиси — Ҳарри Магуайр. «Манчестер Юнайтед» футболчи учун «Лестер»га 88 миллион евро тўлашига тўғри келди. «Қизил иблислар» Магуайрга йил давомида қизиқиш билдириб келди, аммо унинг трансфери ҳадеганда ҳал бўлавермади. «Лестер» ҳам футболчининг нархини кўтаришдан чарчамади ва томонлар охир-оқибат 88 миллион евролик нархда келишувга эришди. Ҳозирча футболчи мавсумни ёмон бошламади. «Челси»га қарши ўйинда «Манчестер Юнайтед» ўз дарвозаси дахлсизлигини сақлаб қолган ҳолда йирик ҳисобда ғалаба қозонди.

Марказий ҳимоячи — Маттейс де Лигт («Ювентус»)

«Кекса синьора» сўнгги мавсум нафақат А Серияда ғолиб чиқди, балки «тилла бола» учун трансферлар бозоридаги жангда ҳам муваффақиятга эришди. 2019 йил Европа майдонларида шовқин-сурон «Аякс»нинг 19 ёшли сардори учун «Ювентус» 85,5 миллион евродан кечишига тўғри келди. Турин клуби мухлислари эса де Лигт тез орада Жоржио Кьеллинининг ўрнини эгаллашига қаттиқ ишонмоқда.

Чап қанот ҳимоячиси — Бенжамен Менди («Манчестер Сити»)

2017 йилда «Манчестер Сити» «Монако»дан яна бир йирик трансферни амалга оширди. «Шаҳарликлар» Бенжамен Менди учун князликларга 57,50 миллион евро тўлади. Натижада Менди ўша вақтдаги жаҳоннинг энг қиммат чап қанот ҳимоячисига айланди. Ва бу ном ҳозиргача ҳам сақланиб турибди. Аммо футболчи жароҳатлар сабаб кўп ҳам майдонга тушаётгани йўқ. Бироқ у жароҳат билан бўлса-да, «Сити» билан совринларни қўлга киритишда давом этмоқда. Сўнгги вақтларда эса Хосеп Гвардиола Мендидан кўра, украиналик Олександр Зинченкога ишонч билдирмоқда.

Ярим ҳимоячи — Пол Погба («Манчестер Юнайтед»)

Яна бир трансфер рекордларидан бири «Манчестер Юнайтед»га тегишли. Пол Погбани «Ювентус»дан қайтариб олишни хоҳлаган «қизил иблислар»нинг 105 миллион евро тўлашига тўғри келган. Погба эса бу пулларга ҳақиқатда ҳам арзишини бир неча йилдан бери манкунианлар сафида исботлашга ҳаракат қилиб келмоқда. Сўнгги вақтда эса унинг Манчестерда бахтсиз эканлиги ва «Реал»га ўтиши мумкинлиги ҳақида хабарлар авжига чиқди.

Ярим ҳимоячи — Жоа Феликс («Атлетико Мадрид»)

«Атлетико» 2019 йил ёзги трансферлар вақтида кўпчилик ажаблантирган ҳолда йирик трансферларни амалга оширди. Хусусан, 127 миллион евро эвазига португалиялик янги юлдуз, 19 ёшли Жоау Феликсни «Бенфика»дан сотиб олди. Мадрид клуби Феликсга «Барселона»га ўтиб кетган Антуан Гризманнинг ўринбосари сифатида қарамоқда. Мавсумолди йиғинларида Феликс жуда сермаҳсул ўйин кўрсатди ва ўзи учун сарфланган миллионлар бежиз кетмаганини исботлашга тушди ҳисоб.

Ярим ҳимоячи — Филиппе Коутиньо («Барселона»)

«Барселона» Неймарни сотиб юборгач, унинг ўрнига бошқа бир бразилиялик футболчини олиб келишга қарор қилди. Аммо каталонлар учун бу арзонга тушмади. Клуб Филиппе Коутиньо учун «Ливерпуль»га 145 миллион евро тўлашига тўғри келди. Бироқ бразилиялик футболчи «Барселона»да узоқ сақланиб қолмади. 2019 йил 19 август куни Коутиньо ижара асосида «Бавария» ўйинчисига айлангани эълон қилинди. Мюнхен клуби келаси мавсум сўнгида футболчини сотиб олиш ҳуқуқини ҳам қўлга киритди.

Ҳужумчи — Килиан Мбаппе (ПСЖ)

1958 йилги Жаҳон Чемпионатида Пеле ёш бўлишига қарамай финал учрашувида гол уришга эришганди. 2018 йилга келиб унинг рекордини франциялик Килиан Мбаппе янгилашга эришди. ЖЧ—2018 даги ўйинлари орқали француз Роналду ва Мессига ўринбосар пайдо бўлганини исботлаб бергандек бўлди. ПСЖ эса ўйлаб ўтирмасдан футболчи учун 135 миллион еврони «Монако»нинг ҳисоб рақамига ўтказиб берди. Ҳозирда эса футболчи ПСЖнинг ишонган тоғига айланган.

Ҳужумчи — Криштиану Роналду  («Ювентус»)

«Ювентус» бир муддат «Реал»нинг кетма-кет Европа Чемпионлар Лигасидаги ғалабалари сирларини ўрганишга ҳаракат қилди. V бу сир — Криштиану Роналдуда эканлигини тушуниб етди. 10 йилдан бери барқарор ўйин кўрсатиб келаётган португалияликсиз евроаренада ғалаба қозониш имконсиз ишдек эканлигини ҳис қилган туринликлар Роналдуни 120 миллион евро эвазига «Реал»дан сотиб олди. Роналду ушбу рўйхатдаги энг ёши катта футболчи. Аммо у бу пулларга ишлайди. У А Сериядаги илк мавсумида 21 та гол уриб, чемпионга айланди. Бироқ Чемпионлар Лигасида ғалаба қозонишнинг уддасидан чиқа олмади.

Ҳужумчи — Неймар (ПСЖ)

Сўнгги вақтларда ПСЖдан кетиши кутилаётган Неймар учун парижликлар 222 миллион евро тўлаганди. «Барселона» эса уни «Сантос»дан олиб келиш учун 2013 йилда 88 миллион евронинг баҳридан ўтганди. Кўплаб мухлислар ҳамон Неймарнинг «Барселона» афсонаси бўлишдан воз кечиб, ПСЖга ўтиб кетганини тушунмайди. Унинг статистикаси ҳам ёмон эмасди — 186 та ўйин, 105 та гол. Аммо қатарлик шайхларнинг пулига рад жавобини бериш жуда ҳам мушкул.