Milliy matbuot markazida Vazirlar Mahkamasi huzuridagi Din ishlari bo‘yicha qo‘mita Qurbon hayitiga bag‘ishlangan brifing o‘tkazdi.
Brifingda qayd etilishicha, joriy yil 9—10-avgust kunlari tashkil etilgan hasharlarda mavjud qadamjolar, tarixiy obidalar va qabristonlarga asosiy e’tibor qaratildi. Respublikaning barcha hududlarida 441 ta qadamjo va ziyoratgoh, 836 ta yodgorlik va obida hamda 8659 ta qabristonda obodonlashtirish ishlari amalga oshirildi.
Joylarda 73087 nafar nogiron, boquvchisini yo‘qotgan fuqaro hamda kam ta’minlangan oilalarga 6 milliard 674 million, 88 ta “Mehribonlik”, “Muruvvat” va “Saxovat” uylariga 676 million, 9570 nafar Ikkinchi jahon urushi qatnashchisi, mehnat faxriylari va nuroniy keksalarga 1 milliard 917 mln so‘mlik, jami bo‘lib 9 milliard 268 million so‘m moddiy yordam ko‘rsatildi va bu kabi ishlar davom etmoqda.
Brifingda mamlakat bo‘ylab Qurbon hayiti namozi ado etilishiga oid ma’lumotlar keltirib o‘tildi.
Ta’kidlanishicha, respublikada faoliyat ko‘rsatayotgan 2063 ta masjiddan 1985 tasida 2 million 239 ming nafar kishi hayit namozini o‘qidi. Jumladan, hayit namozi Andijon viloyatida 172 ta, Namangan viloyatida 184ta, Farg‘ona viloyatida 189 ta, Sirdaryo viloyatida 69 ta, Toshkent viloyatida 221ta, Toshkent shahrida 103ta, Jizzax viloyatida 168 ta, Surxondaryo viloyatida 109 ta, Samarqand viloyatida 271 ta, Buxoro viloyatida 101 ta, Navoiy viloyatida 70 ta, Qashqadaryo viloyatida 181 ta, Xorazm viloyatida 97 ta va Qoraqalpog‘iston Respublikasida 50 ta masjidda ado etildi.
Toshkent shahrida 103 ta masjidda 465 ming nafar fuqaro Hayit namozida ishtirok etdi. Xususan, Hazrati Imom majmuasida 17 ming nafar, “Minor” masjidida 16 ming 300 nafar, Shayx Zayniddin masjidida 31 ming 200 nafar, “Suzuk ota”masjidida 5 ming 800 nafar va “Shayx Muhammad Sodiq Muhammad Yusuf” masjidida 5 ming nafardan ortiq fuqaro jam bo‘ldi.
Hayit namozini joylarda tartibli, tinch-osoyishta o‘tishi ta’minlandi. Jumladan, 22 ming 450 nafardan ortiq ichki ishlar xodimi bayram o‘tadigan obyektlarga jalb etildi.
O‘zbekiston musulmonlari idorasi huzuridagi “Vaqf” xayriya jamoat fondiga Hayit bayrami kuni dastlabki ma’lumotlarga ko‘ra, 5 milliard 990 million so‘mdan ortiq mablag‘ kelib tushdi. Mazkur mablag‘larning tasarrufi shaffoflik asosida belgilangan tartibda amalga oshiriladi.
Bu yil “Vaqf” xayriya jamoat fondi tomonidan Qurbon hayiti munosabati bilan yangilik aksiyasi amalga oshirilmoqda. Fond tomonidan hozirgacha 15 tonna 410 kilogramm, ya’ni 739 million so‘mlik go‘sht mahsuloti tarqatildi.
Izoh (0)