10-avgust, shanba kuni Toshkent shahrida UNWTO va ICCA vakillari ishtirokida biznes uchrashuvlar sanoati (MICE turizm) bo‘yicha mahorat darsi bo‘lib o‘tdi. Tadbir Gastro Bazaar—2019 xalqaro gastronomik festivali doirasida tashkil etildi. Bu haqda Turizmni rivojlantirish qo‘mitasi matbuot xizmati xabar berdi.
Xalqaro ekspertlar ishtirokidagi mahorat darsi Turizmni rivojlantirish davlat qo‘mitasi tashabbusi bilan o‘tkazildi.
Trening maqsadi — mamlakatda o‘tkazilayotgan xalqaro biznes tadbirlar darajasini oshirish bo‘yicha dunyoning yetakchi mutaxassislari tajribasini o‘rganish, O‘zbekistonning MICE turizm salohiyatini oshirish va loyihalarni amalga oshirishdan tushadigan daromadlarni ko‘paytirish. Mehmonxona xizmatini ko‘rsatuvchi xo‘jalik subyektlari hamda turoperatorlardan iborat tadbir ishtirokchilari o‘z yo‘nalishida ICCA va UNWTO akademiyasi vakillari tomonidan xalqaro darajali tadbirlarni o‘tkazish bo‘yicha bepul ta’lim hamda zarur bilimlarni olish imkoniga ega bo‘ldi.
Mahorat darslari UNWTO Affillik dasturining doimiy vakili Dmitriy Ilin (Ispaniya), ICCA Yevropa mintaqaviy direktori Elif Balchi Fisinoglu (Turkiya) tomonidan o‘tildi, Turizmni rivojlantirish davlat qo‘mitasi huzuridagi “Ipak yo‘li” ofisi rahbari Mirtolib Mirzohidov tadbirga moderatorlik qildi.
UNWTO doimiy vakili Dmitriy Ilinning so‘zlariga ko‘ra, uchrashuvlar sanoati turizmning eng muhim segmentlaridan biri hisoblanadi. Zero, u iqtisodiyotga juda katta foyda keltiradi — mavsumiylik tushunchasini kamaytiradi, turistik yo‘nalishlarning yangilanishiga turtki beradi va umuman, innovatsiyalar va ijodiy yondashuvga ijobiy ta’sir ko‘rsatadi.
“Bizning asosiy maqsadimiz — biznes uchrashuvlarni tashkil qilish bo‘yicha davlat turistik tashkilotlari bilan tadbirkorlik subyektlari o‘rtasidagi hamkorlik aloqalarini kengaytirish. O‘zbekiston uchun bu birinchi tajriba, bunday mahorat darslari mamlakat turistik biznesini yangi darajaga olib chiqadi”, — dedi Elif Balchi.
Trening davomida ishtirokchilar MICE-turizm tushunchasi va uning asosiy tamoyillari, zamonaviy tendensiyalar hamda bu yo‘nalishdagi iqtisodiy ko‘rsatkichlar bilan tanishdi, shuningdek, o‘zlarini qiziqtirgan savollarga xalqaro ekspertlardan tegishli javoblar oldi. Turkiya gastronomik turizm uyushmasi boshqaruv raisi Go‘rkan Bo‘ztepe tadbir doirasida MICE-turizmni rivojlantirishda gastronomik turizmning ahamiyatiga doir intervyu berdi:
“Bugun Gastronomik turizm festivali doirasida MICE-turizm mahorat darsi o‘tkazilmoqda. Ta’kidlash joizki, MICE-turizmni rivojlantirishda gastronomik turizm ham juda muhim. Nima uchun deysizmi? Chunki MICE-turizm maqsadida kelayotgan odamlar asosan yuksak didli va serdaromad odamlardir hamda ular o‘zlari xohlagan taomlardan tatib ko‘rish uchun hamma narsaga tayyor. Bunday kishilar kelgan joyida ovqat yeyishi tabiiy va qayd etish lozimki, ularning ba’zilari hatto oilalari bilan ham kelishadi. Ular uchun milliy madaniyat va an’analarga mos muhitda ovqatlanish muhim ahamiyat kasb etadi, shu jihatdan MICE-turizm va gastronomik turizm bir-biriga bog‘liqdir. Shunday ekan, bu kabi festivallarni o‘tkazish juda muhim”.
Izoh (0)