Миллий матбуот марказида Вазирлар Маҳкамаси ҳузуридаги Дин ишлари бўйича қўмита Қурбон ҳайитига бағишланган брифинг ўтказди.
Брифингда қайд этилишича, жорий йил 9—10 август кунлари ташкил этилган ҳашарларда мавжуд қадамжолар, тарихий обидалар ва қабристонларга асосий эътибор қаратилди. Республиканинг барча ҳудудларида 441 та қадамжо ва зиёратгоҳ, 836 та ёдгорлик ва обида ҳамда 8659 та қабристонда ободонлаштириш ишлари амалга оширилди.
Жойларда 73087 нафар ногирон, боқувчисини йўқотган фуқаро ҳамда кам таъминланган оилаларга 6 миллиард 674 миллион, 88 та «Меҳрибонлик», «Мурувват» ва «Саховат» уйларига 676 миллион, 9570 нафар Иккинчи жаҳон уруши қатнашчиси, меҳнат фахрийлари ва нуроний кексаларга 1 миллиард 917 млн сўмлик, жами бўлиб 9 миллиард 268 миллион сўм моддий ёрдам кўрсатилди ва бу каби ишлар давом этмоқда.
Брифингда мамлакат бўйлаб Қурбон ҳайити намози адо этилишига оид маълумотлар келтириб ўтилди.
Таъкидланишича, республикада фаолият кўрсатаётган 2063 та масжиддан 1985 тасида 2 миллион 239 минг нафар киши ҳайит намозини ўқиди. Жумладан, ҳайит намози Андижон вилоятида 172 та, Наманган вилоятида 184та, Фарғона вилоятида 189 та, Сирдарё вилоятида 69 та, Тошкент вилоятида 221та, Тошкент шаҳрида 103та, Жиззах вилоятида 168 та, Сурхондарё вилоятида 109 та, Самарқанд вилоятида 271 та, Бухоро вилоятида 101 та, Навоий вилоятида 70 та, Қашқадарё вилоятида 181 та, Хоразм вилоятида 97 та ва Қорақалпоғистон Республикасида 50 та масжидда адо этилди.
Тошкент шаҳрида 103 та масжидда 465 минг нафар фуқаро Ҳайит намозида иштирок этди. Хусусан, Ҳазрати Имом мажмуасида 17 минг нафар, «Минор» масжидида 16 минг 300 нафар, Шайх Зайниддин масжидида 31 минг 200 нафар, «Сузук ота»масжидида 5 минг 800 нафар ва «Шайх Муҳаммад Содиқ Муҳаммад Юсуф» масжидида 5 минг нафардан ортиқ фуқаро жам бўлди.
Ҳайит намозини жойларда тартибли, тинч-осойишта ўтиши таъминланди. Жумладан, 22 минг 450 нафардан ортиқ ички ишлар ходими байрам ўтадиган объектларга жалб этилди.
Ўзбекистон мусулмонлари идораси ҳузуридаги «Вақф» хайрия жамоат фондига Ҳайит байрами куни дастлабки маълумотларга кўра, 5 миллиард 990 миллион сўмдан ортиқ маблағ келиб тушди. Мазкур маблағларнинг тасарруфи шаффофлик асосида белгиланган тартибда амалга оширилади.
Бу йил «Вақф» хайрия жамоат фонди томонидан Қурбон ҳайити муносабати билан янгилик акцияси амалга оширилмоқда. Фонд томонидан ҳозиргача 15 тонна 410 килограмм, яъни 739 миллион сўмлик гўшт маҳсулоти тарқатилди.
Изоҳ (0)