O‘zbekistonda firibgarlik jinoyati soni ortib bormoqda, deb yozmoqda IIV matbuot xizmati.
Qayd etilishicha, 2019-yilning o‘tgan olti oyi mobaynida sodir etilgan jinoyatlar soni 14 633 tani tashkil etgan bo‘lsa, ushbu jinoyatlardan 1 574 tasini, ya’ni 20,3 foizini firibgarlik jinoyati tashkil etgan. O‘tgan yilning xuddi shu davrida esa jinoyatlarning umumiy soni 21 568 tani, uning tarkibida firibgarlik jinoyati 21,82 foizni ya’ni 2 942 tani tashkil etgan.
Jumladan, Andijon shahrida yashovchi 1988-yilda tug‘ilgan Sardor ismli fuqaro ham ana shunday firibgarlardan birining tuzog‘iga ilingan. 2018-yilning 30-iyul kuni Andijon viloyati Shahrixon tumanida yashovchi 1964-yilda tug‘ilgan Bobur ismli shaxs uni Koreyaga ishlash uchun borishiga yordam beraman deb aytib, uning ishonchiga kirgan.
Shundan so‘ng, Sardor 13 700 dollarni Boburga berib yuborgan. Sardorning ishonuvchanligidan foydalangan Bobur esa pullarni olib, va’dasini bajarmay pullarini o‘z ehtiyojlari yo‘lida ishlatib yuborgan.
Keyinroq aldanganini sezgan Sardor Andijon shahar IIBga ariza bilan murojaat qilgan. Holat yuzasidan jinoyat ishi qo‘zg‘atilib, IIB xodimlari tomonidan ko‘rilgan chora-tadbirlar natijasida Bobur qo‘lga olingan.
Shu yilning 17-fevralida Farg‘ona viloyatining Qo‘qon shahrida yashovchi Xolida ismli ayol ichki ishlar organlariga murojaat qilgan. Uning aytishicha, internet tarmog‘idagi Apple New reklama sayti orqali o‘zini Qozog‘iston fuqarosi Jaden Guldana deb tanishtirgan ayol Telegram orqali Xolida bilan gaplashib, u 2 dona iPhone XS mobil telefoni sotib olsa, unga yana 1 dona mobil telefonini qo‘shib berishini aytib ishontirgan.
So‘ng 2018-yil 26-dekabrida Xolida Qo‘qon shahridagi bankning xalqaro elektron pul o‘tkazmasi orqali J.Guldana nomiga 1 200 dollarni yuborganligi, lekin mobil telefonini ham, pullarini ham qaytarib ololmayotganligini ma’lum qilgan. Holat yuzasidan jinoyat ishi qo‘zg‘atilib, jinoyatni sodir etgan noma’lum shaxsni aniqlash va ushlash choralari ko‘rilgan.
Toshkent shahrining Uchtepa tumanida yashovchi 1988-yilda tug‘ilgan Alisher ham ana shunday aldanib qolgan shaxslardan biridir. 2018-yilning sentabr oyida noma’lum shaxs internet tarmog‘idagi “Olx.uz” onlayn-e’lonlar sayti orqali Lacetti mashinasini 4 300 dollarga sotmoqchi ekanligi haqidagi e’lonni joylashtirgan. Unga Alisher qiziqish bildirayotganini bilgan noma’lum shaxs mashina O‘zbekistonda ro‘yxatdan o‘tganligini, shunday bo‘lsa-da mashina Belarusda ekanligi, agarda Alisher kelishilgan pulni yuborsa, noma’lum shaxs avtomashinani O‘zbekistonga olib kelib, uning nomiga rasmiylashtirishini aytgan.
Uning yolg‘on so‘zlariga ishongan Alisher 2018-yil 7-sentabr kuni “Mikrokreditbank” ATB Toshkent viloyati boshqarmasining Western Union xalqaro pul o‘tkazmasi xizmati orqali Dilorom Ziyadova ismli shaxs nomiga kelishilgan 4 300 dollarni yuborgan. Afsuski, shu kunga qadar Alisher avtomashinani ham, yuborgan pullarini ham qaytarib ololmagan. Unga va’da bergan noma’lum shaxs esa telefon qo‘ng‘iroqlariga javob bermay qo‘ygan.
O‘z o‘rnida Alisherning 2019-yil 5-iyul kuni ichki ishlar organlariga qilgan murojaatiga asosan holat yuzasidan jinoyat ishi qo‘zg‘atilib, noma’lum shaxsni aniqlash va ushlash choralari ko‘rilgan. Ayni vaqtda tergov harakatlari olib borilmoqda.
Izoh (0)