Ўзбекистонда фирибгарлик жинояти сони ортиб бормоқда, деб ёзмоқда ИИВ матбуот хизмати.
Қайд этилишича, 2019 йилнинг ўтган олти ойи мобайнида содир этилган жиноятлар сони 14 633 тани ташкил этган бўлса, ушбу жиноятлардан 1 574 тасини, яъни 20,3 фоизини фирибгарлик жинояти ташкил этган. Ўтган йилнинг худди шу даврида эса жиноятларнинг умумий сони 21 568 тани, унинг таркибида фирибгарлик жинояти 21,82 фоизни яъни 2 942 тани ташкил этган.
Жумладан, Андижон шаҳрида яшовчи 1988 йилда туғилган Сардор исмли фуқаро ҳам ана шундай фирибгарлардан бирининг тузоғига илинган. 2018 йилнинг 30 июль куни Андижон вилояти Шаҳрихон туманида яшовчи 1964 йилда туғилган Бобур исмли шахс уни Кореяга ишлаш учун боришига ёрдам бераман деб айтиб, унинг ишончига кирган.
Шундан сўнг, Сардор 13 700 долларни Бобурга бериб юборган. Сардорнинг ишонувчанлигидан фойдаланган Бобур эса пулларни олиб, ваъдасини бажармай пулларини ўз эҳтиёжлари йўлида ишлатиб юборган.
Кейинроқ алданганини сезган Сардор Андижон шаҳар ИИБга ариза билан мурожаат қилган. Ҳолат юзасидан жиноят иши қўзғатилиб, ИИБ ходимлари томонидан кўрилган чора-тадбирлар натижасида Бобур қўлга олинган.
Шу йилнинг 17 февралида Фарғона вилоятининг Қўқон шаҳрида яшовчи Холида исмли аёл ички ишлар органларига мурожаат қилган. Унинг айтишича, интернет тармоғидаги Apple New реклама сайти орқали ўзини Қозоғистон фуқароси Жаден Гулдана деб таништирган аёл Telegram орқали Холида билан гаплашиб, у 2 дона iPhone XS мобил телефони сотиб олса, унга яна 1 дона мобил телефонини қўшиб беришини айтиб ишонтирган.
Сўнг 2018 йил 26 декабрида Холида Қўқон шаҳридаги банкнинг халқаро электрон пул ўтказмаси орқали Ж.Гулдана номига 1 200 долларни юборганлиги, лекин мобил телефонини ҳам, пулларини ҳам қайтариб ололмаётганлигини маълум қилган. Ҳолат юзасидан жиноят иши қўзғатилиб, жиноятни содир этган номаълум шахсни аниқлаш ва ушлаш чоралари кўрилган.
Тошкент шаҳрининг Учтепа туманида яшовчи 1988 йилда туғилган Алишер ҳам ана шундай алданиб қолган шахслардан биридир. 2018 йилнинг сентябрь ойида номаълум шахс интернет тармоғидаги «Olx.uz» онлайн-эълонлар сайти орқали Lacetti машинасини 4 300 долларга сотмоқчи эканлиги ҳақидаги эълонни жойлаштирган. Унга Алишер қизиқиш билдираётганини билган номаълум шахс машина Ўзбекистонда рўйхатдан ўтганлигини, шундай бўлса-да машина Беларусда эканлиги, агарда Алишер келишилган пулни юборса, номаълум шахс автомашинани Ўзбекистонга олиб келиб, унинг номига расмийлаштиришини айтган.
Унинг ёлғон сўзларига ишонган Алишер 2018 йил 7 сентябрь куни «Микрокредитбанк» АТБ Тошкент вилояти бошқармасининг Western Union халқаро пул ўтказмаси хизмати орқали Дилором Зиядова исмли шахс номига келишилган 4 300 долларни юборган. Афсуски, шу кунга қадар Алишер автомашинани ҳам, юборган пулларини ҳам қайтариб ололмаган. Унга ваъда берган номаълум шахс эса телефон қўнғироқларига жавоб бермай қўйган.
Ўз ўрнида Алишернинг 2019 йил 5 июль куни ички ишлар органларига қилган мурожаатига асосан ҳолат юзасидан жиноят иши қўзғатилиб, номаълум шахсни аниқлаш ва ушлаш чоралари кўрилган. Айни вақтда тергов ҳаракатлари олиб борилмоқда.
Изоҳ (0)