“Daryo” tahririyatiga Qashqadaryo viloyatining G‘uzor tumanida yashovchi Sabohat Urinova murojaat qilib, 6 yildan beri tuman hokimligiga qatnasa-da, uy bilan bog‘liq muammosi hal bo‘lmayotganidan shikoyat qilmoqda.
Murojaatchi 2 nafar farzandini yolg‘iz tarbiyalayotganini, o‘zi esa yolg‘iz ona bo‘lishiga qaramasdan I guruh nogironi ekanligini aytmoqda.
“Daryo” muxbiri muammoni o‘rganish maqsadida G‘uzor tumanining “Tinchlik” mahalla, Tutzor ko‘chasida bo‘ldi.
— 2013-yildan buyon tuman hokimligi ostonasiga qatnayman, ammo uy bilan bog‘liq muammoyim hal bo‘lmaydi, — deydi Sabohat Urinova. — Bu vaqt mobaynida tumanda 4 ta hokim almashdi.
Ma’lum bo‘lishicha, Sabohat Urinova 2013-yildan beri turmush o‘rtog‘i Akmal Yo‘ldoshev bilan birga yashamaydi. Ammo qonuniy nikoh ham bekor bo‘lmagan. Urinovaning aytishicha, u yashab kelayotgan uy turmush o‘rtog‘ining akasi Anvar Aminovga tegishli. Sabohat Urinovaga yashab kelayotgan uyidan birov chiq demagan, albatta. Biroq u turmush o‘rtog‘i bilan joriy yilning 20-avgust kuniga mo‘ljallangan sudda qonuniy ajrashgach, uyni olib qo‘yishlaridan xavotirda. Boisi, hujjat ishlari chatoq. Shu boisdan ham tuman hokimligiga murojaat qilib, ijtimoiy og‘ir ahvolga tushib qolgan xotin-qizlarga mo‘ljallangan uylardan berilishini so‘ragan. Yillar davomida uy-joyga muhtojligi borligini, yashab turgan uyini olib qo‘yishlari mumkinligini aytib kelgan. Tuman xotin-qizlar qo‘mitasi esa ayolning “qo‘ynini puch yong‘oqqa to‘ldirishdan” nariga o‘tmagan.
— Har safar borsam, bo‘ldi uy beramiz, muammoyingizni hal qilamiz deb aldashadi, — deydi Sabohat Urinova.
Tutzor ko‘chaboshisi Latofat Choriyeva hamda shu ko‘chada yashovchi Shahlo Norqulovalar Sabohat Urinovaning ahvoli juda og‘irligini aytib, muammoga tuman hokimligi xotin-qizlar qo‘mitasi beparvo bo‘lib kelayotganligini ta’kidlamoqda.
— Ko‘chaboshi sifatida ham, qo‘shni sifatida ham Sabohatning ahvoli og‘irligini ko‘p aytganman, — deydi Latofat Choriyeva. — Ammo haqiqatni aytib, mutasaddilar ko‘ziga yomon ko‘rinamiz, xolos.
“Tinchlik” MFY kotibi Alisher Boboqulovning aytishicha, haqiqatdan ham Sabohat Urinovaning avholi juda og‘ir. Bu borada Sabohat Urinova tuman hokimligi hamda viloyat hokimligiga ham murojaat qilgan.
— Murojaat bo‘yicha o‘rganishga kelishib, uyi bor degan xulosada ketishyapti, — deydi Alisher Boboqulov. — Lekin bular yashab turgan uy qaynog‘asining nomida. Ertaga tortib olsa, biz ham yordam berolmaymiz.
G‘uzor tuman xotin-qizlar qo‘mitasi raisi Nafisa Shukurova murojaatchi Sabohat Urinovani ko‘p joylarga takror-takror murojaat qilishda ayblab, “sabrsiz” deb atamoqda.
“Tinchlik” mahallasining xotin-qizlar bo‘yicha mutaxassisi Gulmira Qiyomova Sabohat Urinovaning ahvoli 2018-yilda uy-joy berilgan va 2019-yilda ham uy-joy berilishi kerak bo‘lgan ijtimoiy og‘ir ahvolga tushib qolgan xotin-qizlarning ahvolidan-da og‘ir ekanligini ta’kidlab, Sabohat Urinovaning turmush o‘rtog‘i bergan va’da ularni chalg‘itganini aytmoqda.
Ma’lum bo‘lishicha, Sabohat Urinovaning turmush o‘rtog‘i Akmal Yo‘ldoshev 2018-yil yanvar oyida bolalari yashab turgan uyni ularning nomiga o‘tkazib berishini aytib, rozilik bergan. Ammo oradan shuncha vaqt o‘tsa-da, va’dasini bajarmagan. Tuman xotin-qizlar qo‘mitasi ham shu va’daga ishonib, qariyb ikki yildan beri Sabohat Urinovaning muammosini hal qilmay kelgan.
G‘uzor tuman xotin-qizlar qo‘mitasidan ma’lum qilinishicha, tumanda 2018-yil 6 nafar ayolga Vazirlar Mahkamasining 285-sonli qaroriga asosan dastlabki badal to‘lovlari to‘langan uy-joy berilgan bo‘lsa, 2019-yil ham 6 nafar ayol ro‘yxatga kiritilgan. Uy-joy beriladi. Ammo bu ro‘yxatda Sabohat Urinova yo‘q, albatta.
2019-yil uy-joy berilishi mo‘ljal qilingan ayollar ro‘yxatiga ko‘z yugurtirganimizda 6 nafar ayolning 4 nafari hozirda turmush o‘rtog‘i bilan yashayotgan ayollar ekanligi, shukurki 3 nafarining to‘rt muchasi sog‘ ayollar ekanligi oydinlashadi. Sabohat Urinova esa ko‘z bo‘yicha I guruh nogironi bo‘lish barobarida 2 nafar farzandini yolg‘iz tarbiyalamoqda. Xo‘sh, tuman xotin-qizlar qo‘mitasining ishi qay darajada adolatli?
Tuman xotin-qizlar qo‘mitasi raisi Nafisa Shukurova esa shu vaziyatda ham murojaatchini sabrsizlikda ayblab, uning hali uyoqqa, hali bu yoqqa murojaat qilishidan noliyapti.
Nafisa Shukurova “Daryo” muxbirining “Murojaatchi muammosi qachon hal bo‘ladi?” degan savoliga Sabohat Urinova 2020-yilda uy-joy berilishi kerak bo‘lgan ayollar ro‘yxatiga kiritilganligini aytdi. Ro‘yxatga ko‘z yugurtirganimizda haqiqatdan ham uy-joyga muhtoj bo‘lgan 13 nafar ayoldan biri Sabohat Urinova ekanligi ma’lum bo‘ldi.
“Daryo” tahririyati Qashqadaryo viloyati xotin-qizlar qo‘mitasi va tuman xotin-qizlar raisidan vaziyatga izoh so‘rab qoladi.
Izoh (0)