Ijtimoiy tarmoqlarda, ayrim saytlarda Akmal Saidov bilan bog‘liq vaziyat noto‘g‘ri va noxolis talqin qilinmoqda, deb yozadi “Qo‘shni mahalla” Telegram kanali.
Emishki, Inson huquqlari bo‘yicha milliy markaz rahbari Akmal Saidov maktablarda ro‘mol kiyib yurish haqidagi savolga javob berishni istamagan, deyiladi xabarda.
▪️ Aslida esa voqea boshqacha bo‘lgan.
Tadbir kirish so‘zi bilan ochib berilgandan keyin savol-javob boshlanadi. OAV muxbirlaridan biri aynan umumta’lim muassasalarida ro‘mol o‘rab yurish haqida murojaat qiladi (videodagi dialogdan avvalroq videoda bu muloqot yo‘q). Akmal Saidov javob qaytaradi.
Keyin yana bir jurnalist (ya’ni, internetda tarqalgan o‘sha videoni tasvirga olgan shaxs) xuddi shu savolni takrorlaydi. Holbuki ushbu masala bo‘yicha fikr bildirib bo‘lingan edi.
Bir xil savolning yana takroran o‘rtaga tashlanishi va aynan savol berilayotgan lahzadan boshlab videoga olinishi, sarlavhaga umumiy kontekstdan yulib olingan jumlalarning olib chiqilishi — buning provokatsiya ekaniga dalil.
“Akmal Saidov hurmat va muloqot odobini saqlagan holda, savol takror ekaniga qaramay, yana bir bor izoh berishga harakat qiladi. Uning so‘zlariga diqqat bilan e’tibor qiling, videoni qayta ko‘rib chiqing, dialogni to‘liq eshiting. U “javob bermagan” emas, javob bergan!”, — deyiladi xabarda.
“Nima uchun maktablarga ro‘mol bilan kiritilmaydi?” degan savolga Saidov: “Maktabning o‘z ichki tartib-qoidalari bor, ana o‘sha tartibda borish kerak. Maktab — dunyoviy, diniy maktab emas”, deya aniq-tiniq munosabat bildiradi.
Video muallifi: “Hozir aytdingiz-ku, diniy libos yo‘q deb?” deydi. Qarang! Holbuki, Saidov o‘z javobida “diniy libos” so‘zini ishlatmagan. Shunchaki “ichki tartib-qoidalar” deyapti.
Ya’ni, hammasi oddiy va tushunarli — demak, ro‘mol o‘rab yurish maktabdagi o‘sha ichki-tartib qoidalarga to‘g‘ri kelmaydi. Tamom-vassalom! Buning nimasi tushunarsiz? Buni anglash uchun ko‘p narsa shartmas, ozgina sog‘lom fikr kerak.
Lekin tasvirga olib turgan jurnalist yana “diniy libos” haqidagi savolini qayta-qayta tiqishtiradi. Jurnalistning “bir bog‘dan, bir tog‘dan kelishi”dan, mantiqan asoslanmagan qistovlaridan charchagan Akmal Saidov “Men bu savolingizga javob bermayman”, deydi.
Tan olish kerak, jurnalistning o‘sha lahzada o‘zini bunday tutishi, savol berish madaniyatiga amal qilmagani — aslida Saidovga (uning o‘rnida boshqa odam bo‘lishi ham mumkin edi) nisbatan hurmatsizlik. Video parchani shu holatda internetda tarqatishi esa ikki barobar hurmatsizlik — avvalo o‘z-o‘ziga, kasbiga va jamoatchilikka nisbatan hurmatsizlik.
“Bunday noto‘g‘ri talqinlar, ma’lumotni buzib yetkazishlar, dezinformatsiyalardan ehtiyot bo‘ling. Noxolis yondashuv bilan bir-birimizni obro‘sizlantirib qo‘ymaylik”, — deyiladi xabarda.
Izoh (0)