Minskda ilk Belarus—O‘zbekiston yoshlar IT-forumi bo‘lib o‘tmoqda

Minskda ilk Belarus—O‘zbekiston yoshlar IT-forumi bo‘lib o‘tmoqda. Bu haqda “Daryo”ga Yoshlar media markazi ma’lum qildi.

Loyiha dasturi to‘rtta sessiyadan iborat bo‘lib, unda sohadagi yetakchi mutaxassislar ishtirokidagi o‘quv mashg‘ulotlari, yangi texnologiyalar namoyishi, muloqot bahslari o‘tkazilmoqda. Mazkur forumda o‘zbekistonlik 30 nafar faol yoshdan iborat delegatsiyaga Yoshlar ittifoqi markaziy kengashi raisi Qahramon Quranboyev boshchilik qilmoqda.

Forum ishi oldidan Belarus yoshlar ittifoqi va O‘zbekiston yoshlar ittifoqi o‘rtasida o‘tkazilgan uchrashuvda tomonlarning axborot texnologiyalarini rivojlantirish borasidagi o‘zaro hamkorlik masalalari muhokama etilib, istiqbolli rejalari belgilab olindi.

Xalqaro hamkorlik maydonida “Digital Generation Uzbekistan” loyihasi tashkilotchilari tomonidan 25 nafar yoshdan iborat guruh ham qisqa muddatli malaka oshirmoqda. Ular Belarusdagi “Yuqori texnologiyalar parki”da o‘z loyiha va takliflari taqdimotini namoyish etib, IT sohasida biznes yuritish va mehnat bozori kabi muhim yo‘nalishlar bo‘yicha zarur ko‘nikmalarga ega bo‘lyapti.

Shuningdek, ikki davlat yoshlari uchun axborot texnologiyalari sohasidagi yozgi oromgohi ham tashkil etilgan. Oromgohda belaruslik yoshlar bilan bir qatorda 30 nafar o‘zbekistonlik veb dasturlar yaratish, 3D modellashtirish, robototexnika, mexatronika, mobil dastur yaratish sohalarida faoliyat yuritayotgan yoshlar Belarus IT kompaniyalari faoliyati bilan tanishish va tajriba almashish bilan birga yetakchi dasturchilar tomonidan tashkil etiladigan darslarda ham qatnashmoqda.

Joriy yil sentabr oyida belaruslik 30 nafar yosh dasturchi O‘zbekistonga taklif etilishi ko‘zda tutilmoqda.