BMT bosh kotibining IShID tomonidan xalqaro tinchlik va xavfsizlikka tahdid solinishi haqidagi yangi hisoboti e’lon qilindi, deb xabar berdi “Kun.uz”.
Suriya shimoli-sharqida olti oy davomida MDH mamlakatlarining 2000 ga yaqin fuqarosi qo‘lga olingan. 2019-yil boshidan beri ularning 524 nafari — deyarli barchasi ayollar va bolalar — Qozog‘istonga, 156 nafari O‘zbekistonga va 84 nafari Tojikistonga qaytarilgan. Biroq, Markaziy Osiyodan Suriya hamda Afg‘onistonga chet ellik terrorchi jangarilar oqimi to‘xtamayapti.
Hisobotda ta’kidlanishicha, 2012-yildan beri Tojikiston va O‘zbekistonning har biridan 1500 ga yaqin fuqarolar terrorchilik guruhlariga qo‘shilgan.
“Mintaqa davlatlari yangi jangarilar va terrorchilar tarafdorlari paydo bo‘layotganidan xavotirda, ular yollanyapti va o‘z mamlakatlarida qolish haqida buyruq olyapti. 2019-yilda mintaqada maxsus xizmatlar tomonidan o‘tkazilgan qo‘shma amaliyot natijasida IShIDning 26 a’zosi hibsga olindi, ularning ba’zilari qaytgan shaxslar edi”, — deyiladi bosh kotib hisobotida.
Unda xabar qilinishicha, terrorizmni targ‘ib qiluvchi materiallar internetda Markaziy Osiyo davlatlari tillarida tarqatilmoqda, bu ularning aholisini yollash hamda mintaqa mamlakatlarida IShIDning yashirin bo‘linmalarini yaratishda yordam bermoqda.
Izoh (0)