Janubi-G‘arbiy maxsus harbiy okrug: Harbiycha kiyinish qoidalariga amal qilinishini kuzatib borish bizning vazifamiz hisoblanadi

2019-yil 5-avgust kuni “Daryo” internet-nashrida berilgan “Qashqadaryoda bir guruh harbiylar IIB xodimiga tazyiq o‘tkazdi” sarlavhali xabarga Janubi-G‘arbiy maxsus harbiy okrug matbuot xizmati javob berdi va quyidagilarni ma’lum qildi.

2019-yil 29-iyul kuni Qarshi shahrida joylashgan Qarshi—Nishon tumanlararo taksilar qatnash bekatida sodir bo‘lgan Qarshi garnizoni harbiy komendaturasi patrullari hamda Mirishkor tumani ichki ishlar bo‘limi xodimi o‘rtasidagi holat yuzasidan xizmat surishtiruvi o‘tkazildi. Unga ko‘ra, o‘zaro muloqotda bir-birini haqorat qilish, kuch ishlatish va shunga o‘xshash tazyiq va zo‘ravonlik harakatlari sodir etilmagan.

Ichki ishlar bo‘limi xodimi shaharda yurish uchun belgilanmagan dala kiyimida yurgan vaqtida Qarshi garnizoni harbiy komendaturasi patrullari tomonidan to‘xtatilgan va patrul boshlig‘i tomonidan kiyim rusumi bo‘yicha kamchiliklarini aytib, bartaraf etishni iltimos qilganida, u jamoat joyida va mahalliy aholi o‘rtasida o‘zini nomunosib tutgan. Ichki ishlar xodimi keyinchalik taksi mashinasiga o‘tirib, muloqotni davom ettirgan va bu holat tasvirga olingan. IIB xodimi patrul boshlig‘i tomonidan u to‘g‘risidagi ma’lumotlarni yozib olish uchun shaxsini tasdiqlovchi guvohnomasini so‘rab murojaat etganda, u guvohnomasini berishdan bosh tortgan. Natijada videotasvirdagi holat vujudga kelgan. Shundan so‘ng patrul boshlig‘i Qarshi garnizoni harbiy komendantiga telefon orqali vaziyatni bildirgan. Qarshi garnizoni harbiy komendanti IIB xodimi bilan telefon orqali suhbatlashib, IIB xodimiga shaxsini tasdiqlovchi hujjatlarni berishini tushuntirgan. IIB xodimi shaxsni tasdiqlovchi hujjatlarini patrul boshlig‘iga berganidan so‘ng u to‘g‘risidagi ma’lumotlar yozib olinib, IIB xodimiga ruxsat berilgan.

Videotasvirdagi holat patrul boshlig‘i va ichki ishlar xodimining xatti-harakatlari Umumharbiy nizomlar va tegishli me’yoriy-huquqiy hujjatlar talablarining buzilishiga olib kelgan.

Matbuot xizmatining qo‘shimcha qilishicha, O‘zbekiston Respublikasi Prezidentining 1996-yil 9-oktabrdagi farmoniga asosan tasdiqlangan O‘zbekiston Respublikasi Qurolli Kuchlari garnizon va qorovullik xizmati nizomiga ko‘ra, harbiy intizom talablarining bajarilishi va harbiycha kiyinish qoidalariga amal qilinishini kuzatib borish patrullik xizmatining asosiy vazifalaridan biri hisoblanadi.