2019 йил 5 август куни «Дарё» интернет-нашрида берилган «Қашқадарёда бир гуруҳ ҳарбийлар ИИБ ходимига тазйиқ ўтказди» сарлавҳали хабарга Жануби-Ғарбий махсус ҳарбий округ матбуот хизмати жавоб берди ва қуйидагиларни маълум қилди.
2019 йил 29 июль куни Қарши шаҳрида жойлашган Қарши—Нишон туманлараро таксилар қатнаш бекатида содир бўлган Қарши гарнизони ҳарбий комендатураси патруллари ҳамда Миришкор тумани ички ишлар бўлими ходими ўртасидаги ҳолат юзасидан хизмат суриштируви ўтказилди. Унга кўра, ўзаро мулоқотда бир-бирини ҳақорат қилиш, куч ишлатиш ва шунга ўхшаш тазйиқ ва зўравонлик ҳаракатлари содир этилмаган.Ички ишлар бўлими ходими шаҳарда юриш учун белгиланмаган дала кийимида юрган вақтида Қарши гарнизони ҳарбий комендатураси патруллари томонидан тўхтатилган ва патрул бошлиғи томонидан кийим русуми бўйича камчиликларини айтиб, бартараф этишни илтимос қилганида, у жамоат жойида ва маҳаллий аҳоли ўртасида ўзини номуносиб тутган. Ички ишлар ходими кейинчалик такси машинасига ўтириб, мулоқотни давом эттирган ва бу ҳолат тасвирга олинган. ИИБ ходими патрул бошлиғи томонидан у тўғрисидаги маълумотларни ёзиб олиш учун шахсини тасдиқловчи гувоҳномасини сўраб мурожаат этганда, у гувоҳномасини беришдан бош тортган. Натижада видеотасвирдаги ҳолат вужудга келган. Шундан сўнг патрул бошлиғи Қарши гарнизони ҳарбий комендантига телефон орқали вазиятни билдирган. Қарши гарнизони ҳарбий коменданти ИИБ ходими билан телефон орқали суҳбатлашиб, ИИБ ходимига шахсини тасдиқловчи ҳужжатларни беришини тушунтирган. ИИБ ходими шахсни тасдиқловчи ҳужжатларини патрул бошлиғига берганидан сўнг у тўғрисидаги маълумотлар ёзиб олиниб, ИИБ ходимига рухсат берилган.
Видеотасвирдаги ҳолат патрул бошлиғи ва ички ишлар ходимининг хатти-ҳаракатлари Умумҳарбий низомлар ва тегишли меъёрий-ҳуқуқий ҳужжатлар талабларининг бузилишига олиб келган.
Матбуот хизматининг қўшимча қилишича, Ўзбекистон Республикаси Президентининг 1996 йил 9 октябрдаги фармонига асосан тасдиқланган Ўзбекистон Республикаси Қуролли Кучлари гарнизон ва қоровуллик хизмати низомига кўра, ҳарбий интизом талабларининг бажарилиши ва ҳарбийча кийиниш қоидаларига амал қилинишини кузатиб бориш патруллик хизматининг асосий вазифаларидан бири ҳисобланади.
Изоҳ (0)