Moskva markazida millatchi o‘smirlar qirg‘izistonlik quruvchini o‘ldirib qo‘ydi

Moskva markazida uch nafar millatchi o‘smir muhojirni o‘ldirishga gumonlanib qo‘lga olindi, deb xabar beradi “MK.ru”.

Jinoyat iyul oyining oxirida “Maliy Kamenshiki” ko‘chasida sodir bo‘lgan. Skver bo‘ylab aylanib yurgan uch nafar yigitcha yonlaridan o‘tib ketayotgan Qirg‘iziston fuqarolarini payqab qolgan. Muhojirlar qurilishdan yotoqxonasiga qaytayotgan bo‘lgan va ular yigitlarga xuddiki yomon qarab o‘tib ketgandek tuyulgan.

Oqibatda o‘smirlarning eng kattasi, sport mahsulotlari do‘konida konsultant bo‘lib ishlaydigan 19 yoshli yigit gaz ballonchasi bilan qirg‘izlarning yuziga sepgan. Muhojirlar va o‘smirlar o‘rtasida janjal yuzaga kelgan. Yigitlar yonidan pichoq chiqarib ularga hujum qilgan, quruvchilardan biri qo‘lidan jarohat olgan bo‘lsa, ikkinchisining orqasiga pichoq bilan urib o‘ldirishgan.

Oradan bir hafta o‘tgach, gumonlanuvchilar politsiya va FXX xodimlari tomonidan qo‘lga olingan. Ular ijtimoiy tarmoqlarda o‘zlarining g‘oyalarini targ‘ib qilish bilan shug‘ullangan. 17 yoshli yigitning 1,5 ming obunachiga ega “millatchilik jamiyati” ham bo‘lgan.

Yigitning ota-onasi o‘g‘lining bu kabi “hunari”dan xabardor ekanliklarini, biroq hech nima qila olmaganini ma’lum qilgan.