AQSh O‘rta va qisqa masofaga uchuvchi raketalarni yo‘q qilish to‘g‘risidagi shartnomadan rasman chiqmoqchi

AQSh 2-avgustda O‘rta va qisqa masofaga uchuvchi raketalarni yo‘q qilish to‘g‘risidagi shartnomadan rasman chiqadi. “TASS”ning xabar berishicha, bu haqda AQSh prezidentining Milliy xavfsizlik bo‘yicha maslahatchisi Jon Bolton ma’lum qilgan.

U yana bir marta Rossiyani ushbu shartnomani buzganlikda ayblagan. “AQSh uzoq vaqt davomida shartnomaga amal qilib keldi. Rossiya esa bu vaqtda shartnomani buzib, o‘z qurollanishini modernizatsiya qilish maqsadida zamonaviy ballistik va gipertovush tizimlarini ishlab chiqishda davom etdi”, — degan prezident maslahatchisi.

Jon Bolton, shuningdek, shartnoma bilan bog‘liq bo‘lgan boshqa muammoni ham keltirib o‘tgan. “Ushbu shartnoma Xitoy o‘zining o‘rta masofali qurollarni ishlab chiqarayotgan bir paytda bizning qo‘llarimizni bog‘ladi. U hech qanday shartnoma majburiyatlari bilan cheklanmagan edi. Milliy xafvsizlik nuqtayi nazaridan, XXI asrda Amerika xavfsizligini samarali ta’minlash maqsadida qo‘llarimizni bo‘shatishga qaror qildik”, — deb ta’kidlagan u.