АҚШ 2 августда Ўрта ва қисқа масофага учувчи ракеталарни йўқ қилиш тўғрисидаги шартномадан расман чиқади. «ТАСС»нинг хабар беришича, бу ҳақда АҚШ президентининг Миллий хавфсизлик бўйича маслаҳатчиси Жон Болтон маълум қилган.
У яна бир марта Россияни ушбу шартномани бузганликда айблаган. «АҚШ узоқ вақт давомида шартномага амал қилиб келди. Россия эса бу вақтда шартномани бузиб, ўз қуролланишини модернизация қилиш мақсадида замонавий баллистик ва гипертовуш тизимларини ишлаб чиқишда давом этди», — деган президент маслаҳатчиси.
Жон Болтон, шунингдек, шартнома билан боғлиқ бўлган бошқа муаммони ҳам келтириб ўтган. «Ушбу шартнома Хитой ўзининг ўрта масофали қуролларни ишлаб чиқараётган бир пайтда бизнинг қўлларимизни боғлади. У ҳеч қандай шартнома мажбуриятлари билан чекланмаган эди. Миллий хафвсизлик нуқтаи назаридан, XXI асрда Америка хавфсизлигини самарали таъминлаш мақсадида қўлларимизни бўшатишга қарор қилдик», — деб таъкидлаган у.
Изоҳ (0)