Trenerlar, soha ekspertlari hamda vodiy jurnalistlari va blogerlari Farg‘onada OAV bilan bog‘liq og‘riqli savollar javobiga yechim izladi. Bu haqda “Namangan sadosi” gazetasi muharrir o‘rinbosari Orifjon Jo‘rayev ma’lum qildi.
“Yuksalish” umummilliy harakati Buyuk Britaniyaning O‘zbekistondagi elchixonasi bilan hamkorlikda tashkillagan 2 kunlik nazariy-amaliy mashg‘ulotlar jarayonida asosiy e’tibor tahliliy jurnalistika muammolariga qaratildi. Ta’kidlanganidek, bugungi kunda ommaviy axborot vositalarida, ayniqsa, ijtimoiy tarmoqlarda yangiliklar juda ko‘p e’lon qilinmoqda, ammo tahliliy maqolalar kam.
Sohada o‘nlab qonunlar yaratilganiga qaramay, deyarli ishlamayotgani, tizimda nazoratning yo‘qligi qatnashchilar tomonidan afsus bilan ta’kidlandi.
Tahliliy jurnalistika ayni davrning og‘riqli nuqtasi sanalgan matbuotning umrini uzaytirishga ham xizmat qiladi. Deylik, veb-saytlarda e’tiborni tortuvchi anons qoldirib, so‘ngra batafsil gazetaning o‘zida tanishish mumkin.
Mohir trenerlar — ekspert Beruniy Alimov, taniqli bloger, “Davletov.uz” kanali yurituvchisi Qobil Xidirov o‘z tajribalari va xulosalari bilan taqdimotlar ko‘magida o‘rtoqlashdi.
Shuningdek, mintaqaviy seminar-treningda Jurnalistlari ijodiy uyushmasining IV konferensiyasida qabul qilingan O‘zbekiston jurnalistlarining kasb etikasi kodeksi ham bir qur muhokamadan o‘tkazildi.
Unda ko‘p yaxshi gaplar bor, ammo bu kodeks majburiy xarakterga ega emas, faqat tavsiyaviy maqomda bo‘ladi, shu sababli unga amaliyotda qay darajada amal qilinishi noaniq.
Yig‘ilganlar guruhlarga bo‘lingan holda kodeksga qayta ko‘z yugurtirib, takliflarini qayd etdi, himoya qildi.
Bahs-munozara, aqliy hujum, noodatiy o‘yinlar bilan kechgan ochiq muloqot yakunida barchaga “Yuksalish” umummilliy harakati sertifikatlari topshirildi, faol jurnalistlar harakat a’zoligiga qabul qilindi.
Izoh (0)