G‘ijduvon tumanidagi Ko‘krabot qishlog‘i fuqarosi, cho‘pon Qobil Pardayev qaynukasi Bahriddin Xo‘jayevning Rossiyaga ketganidan foydalanib, uning qaramog‘idagi hamqishlog‘iga tegishli qo‘y, echkilarni 36 million 600 ming so‘mga pullab yuborgan. Bu haqda Jinoyat ishlari bo‘yicha G‘ijduvon tuman sudi sudyasi Boborahim Ochilov “Daryo”ga ma’lum qildi.
G‘ijduvon tumanidagi “Paxtaobod” mahalla fuqarolar yig‘inida yashovchi Bahriddin Xo‘jayev ancha yillardan buyon cho‘l massividagi dalalarda odamlarning 200–250 boshga yaqin qo‘y, echkilarini boqib kelgan. O‘z do‘stlari va tanish-bilishlarining qo‘y-qo‘zilarini boqishi evaziga har bir bosh uchun oyida 10 000 so‘mdan pul olishga kelishgan. Qo‘y-qo‘zilarni boqishda ukasi Farhod Xo‘jayev ham yordamlashib kelgan. Biroq cho‘ponchilik qilib kelayotgan Bahriddin turmush taqozosi bilan Rossiyaga jo‘nab ketishiga to‘g‘ri kelgan. Qaramog‘idagi hamqishloqlariga tegishli bo‘lgan qo‘y-qo‘zilarni Ko‘krabot qishlog‘ida yashovchi cho‘pon pochchasi Qobil Pardayevga ishonib, har birini xatlov qilib topshirib ketgan.
Qaynukasining ishonchiga kirib, o‘zgalarning qo‘y-qo‘zisini “xatlab” olgan Qobil Pardayev oradan ko‘p o‘tmay, firibgarlik yo‘liga o‘tgan. Mahalladoshi Oromjon Akramovaga tegishli va har birining bahosi o‘rtacha 1 000 000 so‘m bo‘lgan 35 bosh hisori va duraga qo‘ylarni hamda har birining bahosi o‘rtacha 400 000 so‘m bo‘lgan 4 bosh echkini sotib, pullarni o‘z manfaati yo‘lida sarflagan.
Bahriddin Rossiyaga ketgach, ukasi Farhod qo‘ylardan xabar olish uchun kelgan vaqtda unga “Oromjon Akramovaning qo‘ylari boshqa atarning qo‘ylariga qo‘shilib ketgan” deb aldab kelgan. Bir necha marotaba takrorlangan bu holat Farhodda shubha uyg‘otgan. Aniqlik kiritishga urinishlari zoye ketgan. Oradan ancha vaqt o‘tgandan so‘ng Farhod va Bahriddin Xo‘jayevlarning onasi Munavvara Otamurodova hamda Oromjon Akramovalar G‘ijduvon tuman IIBga ariza bilan murojaat etishga majbur bo‘lgan.
— Kuyovimning o‘zimizga yaqinroq hudud — “Quchchi” cho‘l massividan ancha uzoqda joylashgan “Sho‘rko‘l” yer maydonlariga o‘g‘illarim qaramog‘idagi qo‘ylarni boqishga olib ketgani bizni tashvishga solgan edi. “Kuyovimiz-ku, chuv tushirmas”, degan xayolga borganimiz ham rost. O‘zi tirikchiligimizni bir navi qilib, shuni ortidan sudrab turgan bo‘lsak. Shubhalarimiz to‘g‘ri chiqdi. Na iloj, kuyovim ustidan arz qilishga majbur bo‘ldim. Axir u atarda 250 boshga yaqin boshqa hamqishloqlarimizga ham tegishli qo‘y-qo‘zilar bor, — dedi sudda so‘z olgan onaxon Munavvara Otamurodova.
Sud sudlanuvchi, jabrlanuvchi va guvohlarning ko‘rsatmalarini eshitib, ish bo‘yicha to‘plangan dalillarni tekshirgan. Taraflarning muzokara nutqlari va sudlanuvchining oxirgi so‘zini tinglagan.
Qobil Pardayev o‘zining shaxsiy muammolarini hal qilish maqsadida fuqarolardan olgan qarzlarini to‘lash uchun qo‘y-qo‘zilarni sotishga majbur bo‘lganini sudda tan olgan. Jumladan, 35 bosh qo‘y va 4 bosh echkini sotib yuborib, hozirgi kunda 36 600 000 so‘m yetkazilgan zarardan 6 600 000 so‘minigina qaytara olganini, 30 million so‘mni ham qaytarishini bildirgan.
Qobil Pardayev O‘zbekiston Respublikasi JKning 168-moddasi 2-qismining “a” bandi bilan aybdor, deb topilgan va unga nisbatan O‘zbekiston Respublikasi Jinoyat Kodeksining 57-moddasi qo‘llanilgan. 2 yilu 6 oy muddatga ozodlikdan mahrum qilish jazosi tayinlangan.
Fuqaro Oromjon Akramovaga yetkazilgan zararning qoplanmay qolingan 30 million so‘mini undirish belgilangan.
Izoh (0)