Тренерлар, соҳа экспертлари ҳамда водий журналистлари ва блогерлари Фарғонада ОАВ билан боғлиқ оғриқли саволлар жавобига ечим излади. Бу ҳақда «Наманган садоси»  газетаси муҳаррир ўринбосари Орифжон Жўраев маълум қилди.

Фото: «Юксалиш» умуммиллий ҳаракати

«Юксалиш» умуммиллий ҳаракати Буюк Британиянинг Ўзбекистондаги элчихонаси билан ҳамкорликда  ташкиллаган 2 кунлик назарий-амалий машғулотлар жараёнида асосий эътибор таҳлилий журналистика муаммоларига қаратилди. Таъкидланганидек, бугунги кунда оммавий ахборот воситаларида, айниқса, ижтимоий тармоқларда янгиликлар жуда кўп эълон қилинмоқда, аммо таҳлилий мақолалар кам.

Соҳада ўнлаб қонунлар яратилганига қарамай, деярли ишламаётгани, тизимда назоратнинг йўқлиги қатнашчилар томонидан афсус билан таъкидланди.

Фото: «Юксалиш» умуммиллий ҳаракати

Таҳлилий журналистика айни даврнинг оғриқли нуқтаси саналган матбуотнинг умрини узайтиришга ҳам хизмат қилади. Дейлик, веб-сайтларда эътиборни тортувчи анонс қолдириб, сўнгра батафсил газетанинг ўзида танишиш мумкин.

Моҳир тренерлар — эксперт Беруний Алимов, таниқли блогер, «Davletov.uz» канали юритувчиси Қобил Хидиров ўз тажрибалари ва хулосалари билан тақдимотлар кўмагида ўртоқлашди.

Фото: «Юксалиш» умуммиллий ҳаракати

Шунингдек, минтақавий семинар-тренингда Журналистлари ижодий уюшмасининг IV конференциясида қабул қилинган Ўзбекистон журналистларининг касб этикаси кодекси ҳам бир қур муҳокамадан ўтказилди.

Унда кўп яхши гаплар бор, аммо бу кодекс мажбурий характерга эга эмас, фақат тавсиявий мақомда бўлади, шу сабабли унга амалиётда қай даражада амал қилиниши ноаниқ.

Фото: «Юксалиш» умуммиллий ҳаракати

Йиғилганлар гуруҳларга бўлинган ҳолда кодексга қайта кўз югуртириб, таклифларини қайд этди, ҳимоя қилди.

Баҳс-мунозара, ақлий ҳужум, ноодатий ўйинлар билан кечган очиқ мулоқот якунида барчага «Юксалиш» умуммиллий ҳаракати сертификатлари топширилди, фаол журналистлар ҳаракат аъзолигига қабул қилинди.

Фото: «Юксалиш» умуммиллий ҳаракати