Xabar berilganidek, bugun Senatning sud-huquq masalalari va korrupsiyaga qarshi kurashish qo‘mitasining majlisi bo‘lib o‘tdi. Unda Adliya vazirligining yilning birinchi yarim yilligida belgilangan maqsadli vazifalarning ijro etilishi bo‘yicha hisoboti eshitildi. Bu haqda “Daryo” muxbiri Madina Nurman xabar bermoqda.
Hisobotdan keyin vazirlik vakillariga senatorlar tomonidan berilgan savollar qatorida xodimlarning tizimga jalb qilinishi, ularning faoliyati, mavjud muammolari qatorida yo‘l qo‘yayotgan kamchilik va huquqbuzarliklari ham muhokama etildi.
Jumladan, Adliya vaziri o‘rinbosari Xudoyor Meliyevning xodimlar tomonidan sodir etilgan jinoyatlar bo‘yicha 2016-yilda Adliya sohasi tizimida umumiy 44 nafar, 2017-yilda 11 nafar, 2018-yilda 1 nafari javobgarlikka tortilgani aytildi. Korrupsiyaga qarshi kurashish ishlari doirasida amalga oshirilayotgan choralarga misol sifatida keltirilgan dalilga Sud-huquq masalalari va korrupsiyaga qarshi kurashish qo‘mitasi raisi Botir Matmuratov o‘z munosabatini bildirib o‘tdi:
Korrupsiyaning asosiy sababi xodimlarning yashash sharoiti bilan bog‘liq, deb bekorga aytilmagan. Huquqni muhofaza qiluvchi organlar xodimlari orasida eng yaxshi maosh oladiganlar safida Adliya tizimini keltirib o‘tishim mumkin. Shunday ekan, birinchi galda xodimlarning huquqiy ongini o‘zgartirish kerak. Biz qo‘mitamiz vakillari bilan qayerga bormaylik, doim aytamiz: “Birinchi navbatda odamlarning fikr yuritishini o‘zgartirish lozim”, deb. Korrupsiya deymiz, birinchi galda buni ham yaxshi bilan yomonni, halol bilan haromni ajratgandek, ajratishlarini o‘rgatish talab etiladi. Qamoq jazosi bilan hal etish boshqa masala, birinchi galda ularning ongi, dunyoqarashini o‘zgartirish kerak. Birgina senatorlarning joylarga chiqib tushuntirish ishlari olib borishi bilan cheklanilmaydi, Adliya bu borada namuna ko‘rsatadigan idoralardan biri, deb bilaman. Oliy ta’lim muassasasida ham kuni kecha uchrashuvda jazolash emas, birinchi galda tizimning o‘z “yashash sharoitini” o‘zgartirishi borasida gapirib keldik.Sud-huquq masalalari va korrupsiyaga qarshi kurashish qo‘mitasiga ham bugun, ayniqsa, katta vazifa yuklatilgan. Jamiyatdagi har qanday masalaga biz antikorrupsion nigoh bilan qarashimiz shart. Shunday ekan, Adliya vazirligi bilan bu masalada hamkor bo‘lib zich ishlashimiz lozim.
Izoh (0)