31 yoshli Jobirxon Alimov nafaqat o‘zi istiqomat qilgan “Qashqar” mahallasi, balki Marg‘ilon shahrida ham allaqachon otning qashqasidek tanilib ulgurgan. Dastlab 24 yoshida, 2012-yilda firibgarligi uchun sudlangan bu yigit o‘tgan 7 yil mobaynida 8 marotaba aynan ana shu jinoyati tufayli sudning qora kursisiga o‘tirishning “uddasidan chiqdi”.
Lekin Jobirxonning so‘qir ko‘zi shunda ham ochilmadi. Oqibatda u to‘qqizinchi bor firibgarlikka qo‘l urdi.
Gap shundaki, qonunga binoan xavfli retsidivist deb topilgan Jobirxon 2018-yil aprel oyida milliy shirinliklar va turli pishiriqlar bilan savdo qiluvchi tanishi Nasiba Mamajonovaning uy sotib olish niyatida yurganidan xabar topib qoldi. Xabar topdi-yu, darhol ayolni avrashga kirishdi. Aniqrog‘i, u shaharning Qo‘qon ko‘chasida joylashgan ko‘p qavatli uylardagi xonadonlardan biri o‘ziga tegishli ekanini aytib, N. Mamajonovani aldadi. Nasiba opani ishontirish uchun telefonida bir xonalik uyning rasmini ko‘rsatdi. Soddadil ayol uning gapiga laqqa tushib, uy sotib olish uchun yig‘ib qo‘ygan 5 000 AQSh dollari miqdoridagi pulini unga sanab berdi. Ammo J. Alimov bu pullarni o‘z ehtiyojiga ishlatib yubordi-yu, xaridor ayolga hech qanday uyni rasmiylashtirib bermadi.
Shundan keyin Jobirxon talonchilikka qo‘l urdi. Ya’ni Asaka shahrida yurgan paytida kirakash mashinalardan biriga qo‘l ko‘tarib to‘xtatdi. So‘ng haydovchi G‘ulomjon Qo‘ldoshevga o‘zini IIB xodimi Sanjar deb tanishtirib, Farg‘ona shahridagi 10-sonli tergov hibsxonasiga olib borib kelishini iltimos qildi. Belgilangan manzilga yetishganda esa G‘ulomjonning yolg‘iz ekanligidan foydalanib, unga pichoq o‘qtaldi. Keyin zo‘rlik ishlatib hamda uni qo‘rqitib, avtomashina yukxonasidagi 800 000 so‘m pul va avtomashina texnik pasporti, shuningdek, G‘. Qo‘ldoshevning akasi Furqatjon Qo‘ldoshevning haydovchilik guvohnomasi va ogohlantirish talonlarini talon-toroj qilib, voqea joyidan qochib ketdi.
Bundan tashqari, J. Alimov 2018-yil 18-dekabr kuni Namangan shahrida yashovchi fuqaro Zokir Mansurovni ham “o‘ziga xos” usulda chuv tushirdi. Ya’ni o‘sha kuni soat 14:30 larda Jobirxon Namangandagi “Sardoba” bozori yaqinida Zokir bilan uchrashdi.
— Ismim Aziz, “gorotdel”da ishlayman. Iltimos, Marg‘ilonga olib borib qo‘ysangiz. Xizmat haqingizni beraman, — dedi muloyim muomala qilib.
Albatta, u o‘zini Namangan shahar IIB xodimi deb tanishtirgani sababli Z. Mansurov uning iltimosini yerda qoldirmay, Nexia rusumli avtomashinasini Marg‘ilonga qarab haydadi. Marg‘ilonga yetib borishgach esa Jobir haydovchini Toshloq tumani markaziga boshladi.
— Keling, avval ovqatlanib olaylik, ish qochib ketmaydi, — deya Z. Mansurovni Toshloq shaharchasidagi “Tabassum” oshxonasiga taklif qildi.
U shunday deb ikki kishilik ovqat, non, choy va salat buyurdi. Keyin Zokirdan:
— Mashinangizni berib tursangiz, ovqat kelguncha g‘ir etib bir joyga o‘tib kelaman, — deb so‘radi.
Namanganlik haydovchi esa uning IIB xodimi ekanligiga ishongani uchun ham hech ikkilanmay mashina kaliti berdi. Lekin firibgar mashinani haydab ketgach, avvaliga mashina salonidagi 200 000 so‘m miqdoridagi pul, Z. Mansurovning fuqarolik pasporti va haydovchilik guvohnomasi, sug‘urta polisi, avtomashinani boshqarish uchun rasmiylashtirilgan ishonchnoma hamda boshqa hujjatlarni g‘arazgo‘ylik bilan talon-toroj qildi. So‘ngra shaharning Xo‘japorso mahallasida fuqaro Murodjon Ibodovga avtomashinaning o‘ziga tegishli ekanligini aytib, 2 500 AQSh dollariga sotib yubordi. Qo‘lga kiritilgan pullarni esa har galgidek jig‘ildoniga urdi.
Biroq bu hali hammasi emasdi. Negaki, J. Alimov o‘zini IIB xodimi “Aziz” va “Sherzod” deya tanishtirib, yana 7 nafar fuqaroni firib to‘riga ilintirdi. Shu yo‘l bilan ularning 33 985 808 so‘mlik pul va mulklarini qo‘lga kiritdi. Ammo jabrlanuvchilarning murojaatiga binoan jinoyat ishi qo‘zg‘atilgandagina u firibgarligini to‘xtatib, tavba-tazarru qilishga tushdi.
Jinoyat ishlari bo‘yicha Farg‘ona shahar sudi aybdorning qilmishiga yarasha qonuniy jazo tayinladi.
Izoh (0)