Сенатор Ботир Матмуратов: коррупциянинг туб сабаби тизимларнинг шароити билан боғлиқ

Хабар берилганидек, бугун Сенатнинг суд-ҳуқуқ масалалари ва коррупцияга қарши курашиш қўмитасининг мажлиси бўлиб ўтди. Унда Адлия вазирлигининг йилнинг биринчи ярим йиллигида белгиланган мақсадли вазифаларнинг ижро этилиши бўйича ҳисоботи эшитилди. Бу ҳақда «Дарё» мухбири Мадина Нурман хабар бермоқда.

Ҳисоботдан кейин вазирлик вакилларига сенаторлар томонидан берилган саволлар қаторида ходимларнинг тизимга жалб қилиниши, уларнинг фаолияти, мавжуд муаммолари қаторида йўл қўяётган камчилик ва ҳуқуқбузарликлари ҳам муҳокама этилди.

Жумладан, Адлия вазири ўринбосари Худоёр Мелиевнинг ходимлар томонидан содир этилган жиноятлар бўйича 2016 йилда Адлия соҳаси тизимида умумий 44 нафар, 2017 йилда 11 нафар, 2018 йилда 1 нафари жавобгарликка тортилгани айтилди. Коррупцияга қарши курашиш ишлари доирасида амалга оширилаётган чораларга мисол сифатида келтирилган далилга Суд-ҳуқуқ масалалари ва коррупцияга қарши курашиш қўмитаси раиси Ботир Матмуратов ўз муносабатини билдириб ўтди:

Коррупциянинг асосий сабаби ходимларнинг яшаш шароити билан боғлиқ, деб бекорга айтилмаган. Ҳуқуқни муҳофаза қилувчи органлар ходимлари орасида энг яхши маош оладиганлар сафида Адлия тизимини келтириб ўтишим мумкин. Шундай экан, биринчи галда ходимларнинг ҳуқуқий онгини ўзгартириш керак. Биз қўмитамиз вакиллари билан қаерга бормайлик, доим айтамиз: «Биринчи навбатда одамларнинг фикр юритишини ўзгартириш лозим», деб. Коррупция деймиз, биринчи галда буни ҳам яхши билан ёмонни, ҳалол билан ҳаромни ажратгандек, ажратишларини ўргатиш талаб этилади. Қамоқ жазоси билан ҳал этиш бошқа масала, биринчи галда уларнинг онги, дунёқарашини ўзгартириш керак. Биргина сенаторларнинг жойларга чиқиб тушунтириш ишлари олиб бориши билан чекланилмайди, Адлия бу борада намуна кўрсатадиган идоралардан бири, деб биламан. Олий таълим муассасасида ҳам куни кеча учрашувда жазолаш эмас, биринчи галда тизимнинг ўз «яшаш шароитини» ўзгартириши борасида гапириб келдик.

Суд-ҳуқуқ масалалари ва коррупцияга қарши курашиш қўмитасига ҳам бугун, айниқса, катта вазифа юклатилган. Жамиятдаги ҳар қандай масалага биз антикоррупцион нигоҳ билан қарашимиз шарт. Шундай экан, Адлия вазирлиги билан бу масалада ҳамкор бўлиб зич ишлашимиз лозим.