Putin Skripallarni Britaniya maxsus xizmatlari zaharlaganiga ishonmasligini bildirdi

Vladimir Putin Rossiya Bosh razvedka boshqarmasi (GRU) sobiq polkovnigi Sergey Skripalning Britaniya maxsus xizmatlari tomonidan zaharlanganiga ishonmasligini aytdi. “TASS”ning xabar berishicha, Rossiya prezidenti amerikalik rejissor Oliver Stounga bergan intervyusida shunday fikr bildirgan.

“Ochig‘ini aytsam, bunga uncha ham ishonmayman. Men bunga ishonmayman”, — degan Putin Stounning Skripalni Britaniya maxsus xizmatlari vakillari zaharlagan bo‘lishi mumkinmi-yo‘qmi mazmunidagi savoliga javob berib.

Rossiya prezidentining qo‘shimcha qilishicha, u Skripal hozir qayerda ekanligini bilmaydi va uning matbuotga qandaydir axborot bera olishi mumkinligiga shubha bildirgan.

“Bunga shubham bor. U safdan chiqib bo‘ldi. Unda qanday axborot bo‘lishi mumkin?”, — degan u.