Buxoro yoshlar markazida “Barchasi o‘z qo‘lingda” dekadasi doirasida Buxoro viloyati IIB boshlig‘i, polkovnik Shuhrat Aliyev bilan “Rahbar va yoshlar” uchrashuvi bo‘lib o‘tdi.
Uchrashuvda 2019-yilning 6 oyida voyaga yetmaganlar tomonidan sodir etilgan jinoyatlar 38,09 foizga kamaygan bo‘lsa-da, Buxoro tumani, Jondor va Shofirkon tumanlarida 100 foizga, G‘ijduvon tumanida 150 foizga oshgani qayd etildi.
— Buxoroda 18–30 yoshdagi shaxslar tomonidan sodir etilgan jinoyatlar 20,3 foizga hamda ularda ishtirok etgan yoshlar 25 foizga kamaydi. Biroq bir vaqtning o‘zida ayrim hududlarda ijobiy natijaga erishilmadi. Ayniqsa, yoshlar tomonidan sodir etilgan jinoyatlar G‘ijduvonda 5,5 foizga, Qorovulbozorda 200 foizga, Romitanda 275 foizga, shuningdek, yo‘l transportida 900 foizga ko‘paydi. Yoshlar tomonidan sodir etilgan jinoyatlarning 20,55 foizi yoki har beshinchisi yo‘l-transport hodisalarini tashkil etadi, — dedi Shuhrat Aliyev. — Xuddi shu ma’noda, haydovchilik sohasida o‘qiyotgan yoshlarning darslarga qatnovini nazoratdan o‘tkazganimizda, ularning darslarga kelmayotganining guvohi bo‘ldik. Bundan tashqari, yoshlarimiz o‘rtasida internet bilan bog‘liq juda ko‘p noxush holatlar mavjud. Har qanday holatdayam sodir etilishi mumkin bo‘lgan jinoyatlarning oldini olishimiz, mavjud muammoni gapirmasdan, yuzaga kelishi mumkin bo‘lgan muammoni bartaraf etish haqida o‘ylashimiz kerak.
Viloyatda 60 ta haydovchilik guvohnomalariga nomzodlarni tayyorlovchi ta’lim muassasalari mavjud. O‘tkazilgan oshkora va nooshkora tekshiruvlarda ta’lim jarayonlariga o‘quvchilarning to‘liq jalb qilinmaganligi aniqlangan. Jumladan, Vobkent tumanidagi Mudofaaga ko‘maklashuvchi vatanparvar tashkilotida tashkil etilgan o‘quv-yig‘inlar tekshirilganda, 5 ta guruhga jalb qilingan 25 nafar o‘quvchidan 9 nafari kelmagan. Buxoro tumanida esa bu ko‘rsatkichda 125 nafardan 63 nafar qayd etilgan.
Yoshlar o‘rtasidagi jinoyatchilikning oldini olish bo‘yicha jinoyatchilikka moyilligi bor 336 nafar yosh bilan yakka tartibda profilaktik ish olib borilgan. 116 nafari ijtimoiy-huquqiy yordam ko‘rsatish markaziga joylashtirilgan. 12 nafari maxsus ixtisoslashtirilgan yopiq turdagi kasb-hunar kolleji va maktab-internatga yuborilgan. 479 marotaba o‘tkazilgan tungi reydlarda 37 ta huquqbuzarlik holati aniqlangan. Farzandi tarbiyasiga salbiy ta’sir ko‘rsatgan 212 nafar ota-ona profilaktik hisobga olingan.
Ayni paytda viloyatda 120 ta “Fidokor yoshlar” patrul guruhlarida 2244 nafar harbiy xizmatni o‘tagan, IIB hamda milliy gvardiya tizimida ishlash istagida bo‘lgan yoshlar jalb qilingan.
“Rahbar va yoshlar” uchrashuvida “Fidokor yoshlar” patrul guruhi a’zolariga maxsus xizmat kiyimlari va maskanlarda osoyishtalik va xotirjamlikni ta’minlashda qo‘shgan hissasi uchun tashakkurnomalar topshirildi.
— Hech bir bola biz uchun begona emas. Har biri o‘zimizning farzandimiz. Ularning tarbiyasiga esa hammamiz bir xilda mas’ulmiz. Birlashib, birgalashib, harakat qilsak, Buxoro yoshlari Respublikada birorta ham jinoyat huquqbuzarlik sodir etmaydi, deb ishonaman, — dedi Shuhrat Aliyev.
Uchrashuv so‘ngida “Tinchlik ortida” nomli badiiy film namoyish etildi.
Izoh (0)